Ukrayina quvetleri Qırımnı Rusiye ordusı içün elverişsiz yapmağa tırışa – general Hoces

İyülniñ 22-nde Ukaryina Silâlı Quvetleri işğal etilgen Qırımnıñ Büyük Onlar qasabasında yerleşken Rusiye ordusınıñ neft bazasına ve arbiy yedekler anbarlarına darbe endirdi. Bundan soñ işğal reberlik adamlarnı tahliye etmege ve trenler areketini lâğu etmege mecbur oldı. Darbelerni em USQ, em işğal etilgen Qırımdaki RF temsiljileri tasdıqladı, dep qayd ete öz metninde "Amerika Sesi"niñ Ukrayina hızmeti.

AP malümatına köre, Qırımnıñ işğal reberligi patlav yerinden 5 km radiusında adamlarnı tahliye etip başlağan.

SNN telekanalı, köpürdeki patlav Moskvanıñ arbiy kampaniyasına logistik ve simvolik bir darbe olğanını hatırlata. 3,7 milliard dollarlıq koridor em yarımadanıñ er künki ihtiyacarı, em de Rusiye ordusınıñ ğıdası içün kritik damarıdır. Ukrayina Telükesizlik hızmetiniñ (UTH) temilcisi ile intervyüge atfı eterek, SNN darbe UTH ve Ukrayina Arbiy deñiz quvetleriniñ ortaq ameliyatı olğaınnı bildire.

"Ukrayina ordusı Rusiyeniñ Qara deñiz flotuna zarar ketirmek ve Rusiyeniñ müim techizat hatlarını kesmek içün işğal etilgen Qırımdaki nişanlarğa devamlı olaraq darbe endire", - dep yaza SNN ve Qırımnıñ işğalden azat etilmesi Ukrayinanıñ nişanı olaraq qalğanını hatırlata.

İyülniñ 22-nde aqşamğa yaqın Qırımnıñ işğal akimiyeti Rusiyeni Qırım yarımadası ile bağlağan köpürde areket yañartılğanını bildirdi. Resmiy telegram kanaldaki beyanatta köpürdeki yolnıñ qapatılmasınıñ sebeperi kösterilmedi.

Bundan evel iyülniñ 17-nde ücümden soñ Keriç köpründeki yol qapatılğan edi.

Köpür keçken yılnıñ oktâbr ayında bomba tarafından zarar körgen soñ ancaq yaqın zamanda tam şekilde çalışıp başladı.

Washington Post Ukrayina prezidenti Volodımır Zelenskıynıñ Qırım köprü cenkni arbiy yedeklernen temin etken yol, "tınçlıqnı degil de, cenkni ketirgen er angi nişan" ise yoq etilmek kerek olğanı aqqında sözlerini hatırlata.

Amerika Cenk araştırmaları institutı qayd etken edi: Keriç köprüniñ patlatılmasından soñ Rusiye ve yarımadanıñ işğal akimiyeti adamlarğa Qırımğa ketmekni tevsiye etmek yerine, rusiyelilerni arbiy areketler mıntaqasına ketmege teşviq ete.

"Ukrayina quvetleri Qırımnı Rusiye ordusı içün elverişsiz yapmağa tırışa", - dep izaatladı Qırımğa ücümlerni Avropadki ABD Qara quvetleriniñ sabıq komandanı Ben Hoces.

Onıñ fikrince ABD-niñ ukrayinlerge ATACMS uzaq menzilli raketalarnen yardım etmesi yahşı olur edi. O zaman, RF Qara deñiz flotu "Novorosiyskke köçmek" mecbur olur edi, dep saya general.

MALÜMAT: Ukrayinağa qarşı Rusiye silâlı ücümi 2022 senesi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.

Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.

Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.

Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.