Qara qış ayınıñ 28-ne qadar gecesi Ukraina Mudafaa Quvetleri Rusiyede ve Ukrayinanıñ işğal etilgen bölgelerinde bir sıra nişanğa ücüm etti, dep haber ete Ukrayina Silâlı Quvetleriniñ Baş Ştabı.
Hususan, komandanlıqnıñ malümatına köre, işğal etilgen Donbassta Velika Novosilka (anda dronlarnıñ idare etüv merkezi uruldı), Şahovo, Grigoryevka rayonlarında rusiye şahsiy erkânınıñ yerleşüv yeri uruldı.
"Ukrayina Mudafaa Quvetleri bölükleri Rusiyeniñ Voronej vilâyetindeki Hoholskaya neft bazasına da ücüm etti. Neft mahsulatlarnıñ yanıp bağlağanı tasdıqlandı, qalın tütün körüne. Neticeler teşkerile", — dep, qayd etile beyanatta.
Bundan ğayrı Ukrayina ştabı işğal etilgen Luğansk vilâyetindeki Nijnâ Duvanka yanındaki silâ anbarı, Zaporijjâdaki Ğulâypole yanında rus quvetleriniñ yerleşüv yeri, Dnbpropetrovsk vilâyetinde Berezove yanında batalyonnıñ idare noqtasına ücüm etilgenini bildirdi.
Ukrayina Silâlı Quvetleriniñ Baş ştabı Rusiyeniñ Belgorod vilâyetindeki Kolotilovka köyünde duşmannıñ şahsiy erkanınıñ bulunuv yeri urulğanını da qayd etti.
Rusiyeniñ Ukrayinağa keñ kölemli basuvı başlağanından berli Rusiye regionları ve Rusiye tarafından işğal etilgen topraqlar daima ateşke ve dron ücümlerine oğraylar.