Ukrayina Medeniyet ve haber siyaseti nazirligi işğal etilgen Bağçasaraydaki Hansaraynıñ "restavratsiyası" ile bağlı vaziyetni daima közete. Bunıñ aqqında nazirlikniñ Qırım.Aqiqatnıñ malümat talabına bergen cevabında yazıla.
"Hansaray etrafındaki vaziyet umummilliy facia mevzusı olaraq qalmaqta. Hususan onıñ saqlanması mevzusı, çünki obyektte restavratsiya qaidelerine riayet etilmegen, Ukrayina ve halqara qanunları ile kelişilmegen kütleviy qurucılıq işleri ketmekte. Bu işler tarihiy ve medeniy qıymeti olğan abideniñ yoq etilmesi içün kerçek telüke yarata ve cinayet alâmetlernie malik", - dep yazıla nazirlikniñ beyanatında.
Ukrayina Medeniyet nazirliginde "Rusiye Fedaratsiyası silâlı çatışma zamanı medeniyet abidelerini qoruğan halqara gumanitar uquq qaidelerine aselet emiyet bermey", dep bildirdiler.
"Ukrayina devleti halqara uquq, hususan Gaaga şartnamesi ile közde tutulğan Qırımda Ukrayinanıñ medeniy servetleriniñ Rusiye Fedaratsiyası tarafından mahv etilmesine ve menimsenilmesine qarşı çıqmaq içün halqara seviyede ve qanunlarımız çerçivesinde mümkün olğan er şeyni yapa: közetüv ve haber berüv, tahqiq etüv ve mesüliyetke celp etüv, vaqialarnı aydınlatuv ve suçlu şahıslarnı taqip etüv", - dep qoştılar nazirlikte.
Daa evel Ukrayina prezidentiniñ Qırım MC-deki daimiy temsilciliginiñ matbuat hızmetinde Rusiye işğalcileri Bağçasaraydaki Hansaraynıñ bir qısmı olğan Qırım Geray Hannıñ Altın odasını yoq ettiler, dep haber ettiler.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
Qırımnıñ Rusiye tarafından işğal etilüvi
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
