Ukrayina Tış işler nazirligi Qırımtatar Milliy Meclisiniñ Rusiye akimiyeti tarafından yasaqlanmasınıñ doquzıncı yılı munasebetinen beyanatını derc etti.
Qayd etilgenine köre, yasaq Rusiye Federatsiyasınıñ qırımtatarlarnı ayırımğa oğratmaq, Qırımnıñ bütün tamır halqlarınıñ milliy kimligini yoq etmek, medeniyet, til ve ananelerini unutmağa mecbur etmek ıntıluvı oldı.
«Rusiye akimiyetiniñ areketleri Kreml rejiminiñ halqara uquq normaları ve printsiplerine, şu cümleden ırqiy ayırımnıñ er angi şeklini yoq etüv halqara şartnamesi, Avropa Şurasınıñ İnsan aqlarını qorçalav ve BMniñ esas serbestlikleri şartnamesine, BMniñ Halqlarnıñ esas serbestlikleri şartnamesine bütünley itibarsızlıq köstermegenini açıq-aydın kösterdi», – dep aytıla Tış işler nazirliginiñ beyanatında.
Ne de olsa, müessise qayd etkenine köre, bu yasaq qırımtatar halqınıñ azatlıq ruhunı bozmadı.
«Repressiya ve apishanelerge baqmadan, uzun on bir yıldan berli o, öz toprağında barışıq içinde yaşamaq qanuniy aqqı oğrunda küreşmege devam ete. 224 serbestlik mabüsi, olardan 134-ü qırımtatarı, Rusiye işğalcileri tarafından tek etnik, diniy ya da siyasiy inançları içün qanunsız bir şekilde Qırımnıñ apis zindanlarına qapatıldı», – dep aytıla beyanatta.
«Bizim fikrimiz deñişmedi: Qırım – Ukrayinadır. Ne qadar vaqıt kerek olsa bile, bir kün işğal biter, adalet ise ğayrıdan tiklenir. Qırımtatar Milliy Meclisi Qırımdaki faaliyetini mıtlaqa yañıdan başlatır, taqip ve repressiyalarğa alâqası olğan er kes halqara uquq talap etkeni kibi cezasını alır», – dep bildirdi Tış işler nazirligi.
Qırımtatar Milliy Meclisi – 1991 senesi qırımtatar halqınıñ aq-uquqları ve menfaatlarını qorumaq içün qurulğan temsiliy organdır. 2014 senesi Qırım işğal etilgen soñ Meclis faaliyeti taqip etilip başlandı.
2016 senesi sentâbr ayında Rusiye Yuqarı mahkemesi Meclisni «ekstremist teşkilâtı» olaraq tanıma ve Rusiye Federatsiyasında ve işğal etilgen Qırımda faaliyetini yasaqlav qararını deñiştirmedi.
BM, AB ve bir sıra halqara teşkilâtnen beraber halqara toplulıq bu qararnı takbih etip, bunı qırımtatarlarnıñ aqlarını bozuv ve etnik ayırım olaraq tasnif etti. Ukrayina ve dünya institutları yasaqnı lâğu etmege ve Qırımda Meclisniñ işini ğayrıdan tiklemege talap eteler.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
