Qırımda Rusiye Federatsiyasınıñ arbiyleri Ukrayınanıñ qarşı ücümi vaziyetinde qullana bilecek farqlı stsenariylerni baqa, olardan biri – yarımadadan çekilüvdir. Bu aqta Ukrayına Mudafaa nazirligi Baş istihbarat idaresiniñ vekili Andriy Yusov Azatlıq Radiosı yayınında ayttı.
Onıñ bildirgenine köre, rusiyeliler aylar devamında Qırım mudafaasına azırlandı ve bunı yapmağa devam ete. Şunıñ içün azırlanğan mudafaanı, hususan fortifikatsion, müendis inşaatlarnı, çoq kilometrli okoplarnı köremiz.
«Amma olar farqlı stsenariylerni baqa. Ve Qırımda o okoplarnıñ bir qısmı vaqtınca işğal etilgen Qırımnıñ esas Ukrayına ile memuriy sıñırından uzaq buluna. Yani olar çekilüvni de baqalar. Ve bu stsenariyni kerçekleştirmek içün Ukrayına Telükesizlik ve mudafaa quvetleri çalışa», – dep qayd etti Baş istihbarat idaresiniñ vekili.
Ukrayına prezidenti Volodımır Zelenskıy ücüm bir «Gollivud filmi» degil, çünki «insanlarnıñ ayatı bar», dep qayd etti. Ukrayına Silâlı quvetleriniñ baş komandanı Valeriy Zalujnıy Ukrayınanıñ qarşı ücümi «beklengenden daa yavaş» kete degen sözler onı «açuvlandıra» dep bildirdi ve Ukrayınanıñ azat etilgen er bir metri «qannen berile», dep qoştı.
ABD ştabları yolbaşçılarınıñ birleşken komitet yolbaşçısı general Mark Milli Ukrayına Silâlı quvetleriniñ qarşı ücümi «kesen-kes ileriley», amma devamlı ve «pek qanlı» olacaq, dep ayttı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
