Ukrayına Silâlı quvetleriniñ qarşı ücüm tafsilâtları Ukrayına arbiylerine keder etmemek içün açıq sürette muzakere etilmemeli, dep bildirdi Ukrayına mudafaa naziriniñ muavini Ğanna Malâr.
«Harkiv vilâyetindeki qarşı ücüm başlamazdan evel kene yahşı onı kimse pabliklerde muzakere etmedi. Ve arbiylerden ğayrı arbiy areketler alanına kiriş bütünley qapatılğan edi. O vaqıt büyük istilâ vaqtında topraqlarımıznı azat etüv sıqlığı ceetinden eñ muvafaqiyetli operatsiya kerçekleştirilgen edi», – dep yazdı Ukrayına mudafaa naziriniñ muavini Telegramda.
Onıñ hatırlatqanına köre, strategik arbiy planlarnı ve fikirlerni Ukrayınada tek üç kişi aydınlata bile – Ukrayına prezidenti Volodımır Zelenskıy, Ukrayına mudafaa naziri Oleksiy Reznikov ve Ukrayına Silâlı quvetleriniñ baş komandanı Valeriy Zalujnıy.
«Yayınlarda ekspertlerden soramağa kerekmey – qarşı ücüm ne alda, bu mevzuda blog yazmağa kerekmey, ordumıznıñ arbiy planlarını açıq sürette muzakere etmege kerekmey. Bir strategik planımız bar – bütün topraqlarımıznı azat etmek. Tafsilâtlar – arbiy sırdır», – dep qoştı Ğanna Malâr.
«ÇVK Vagner» Rusiye yalçı gruppirovkasınıñ qurucısı Yevgeniy Prigojin Rusiye mudafaa naziri Sergey Şoyguğa mektüp yazıp, ondan Ukrayınanıñ qarşı ücümini qaytarmaq içün yardım istedi. Onıñ fikirince, qarşı ücüm martnıñ soñunda ya da aprelde olmalı.
Ukrayına prezidenti Volodımır Zelenskıy şarqtaki vaziyetni «qıyın» dep adlandırdı ve bunıñ sebebi az olğan silâ ola, dep tekrarladı. Ukrayınağa silâ ve qırıcılar kerek, dep qayd etti Ukrayına lideri.
Martnıñ 24-nde saba Ukrayına Silâlı quvetleriniñ Baş ştabı talilcilerniñ Rusiye ücüminiñ zayıflama ihtimali aqqında tahminlerine baqmadan, Rusiye Federatsiyasınıñ ordusı Bahmutqa yapqan ücümini toqtatmay, dep bildirdi.
NATO istihbaratınıñ malümatına köre, Rusiye Bahmut yaqınlarında Ukrayınadan beş qat çoq asker coya.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
