Ukrayina Silâlı Quvetleriniñ Arbiy urucı sistemalarınıñ Baş idaresiniñ yolbaşçı vazifesini icra etken Sergiy Baranov, Canköyde iddia etilgen pilotsız uçaq ücümleriniñ maqsatlarını bildirdi. Bunı Ukrinform haber ete.
Arbiyniñ sözlerine köre, patlavlar Rusiye ordusınıñ işğal etilgen Melitopol ve Herson vilâyetiniñ qısmında logistik teminatını toqtatmaq kerek edi.
"Canköy, misal olaraq, Melitopol ya da Hersonğa ketken logistika yolunıñ qolunda olğan qavuşaqlardan biridir. Şunıñ içün böyle ücümniñ maqsatlarından biri duşmannıñ bizim topraqlarımızdaki gruppalarnıñ logistik teminatına mania olmaq ya da onı tamamınen toqtatmaq edi", - dedi o.
Aynı zamanda, Baranov Rusiye Qara deñiz flotuna teslimatqa bu tesir etmez dep saya. Çünki "diger demiryol qavuşaqları, alâ daa Rusiye bazalarına yaqındır".
Martnıñ 20-nde aqşam işğal etilgen Qırımnıñ şimalinde Canköyde sesli patlavlar eşitildi. Bu aqta yerli sakinler Telegram kanallarında bildire.
Ukrayina Mudafaa nazirliginiñ Baş istihbarat idaresiniñ haber etkenine köre, martnıñ 20-nde aqşam saatlarında yüz bergen patlavlar neticesinde Rusiyeniñ "Kalibr NK" qanatlı raketaları yoq etilgen.
Canköydeki patlavlar aqqında «Krımskiy veter» Telegram kanalınıñ oquyıcıları haber ete. Ava mudafaasınıñ işi ve tüşürilgen uçucısız aqqında «ÇP Severnıy Krım» Telegram kanalınıñ izatalarında yazalar. «Çat Tipiçnıy Canköy | Canköy» Telegram kanalında 10 patlav aqqında haber etile.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayına uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksenov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Yarımadada yüksek (sarı) terror telükesi bar. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
