Çarşenbe künü, oktâbrniñ 14-nde, Ukrainada üç bayram qayd etile: Ukraina imayecisi künü, Pokrov Presvâtoy Bogoroditsı ve Ukraina isyankâr ordusı qurulışınıñ 75 yılı.
Kyivdeki Ukraina halq mimarcılığı ve turmuşı milliy müzeyinde medeniy-bediiy tedbirler ötkerilecek, qırımtatar askerlerini qutlap taqdirleycekler.
Qırımtatar Milliy Meclisiniñ reisi Refat Çubarov Ukraina imayecilerini – «qoluna silâ alıp, Ukraina mustaqilligini qorçalağan qadın ve erkeklerni» endi tebrikledi.
«Rusiye-Ukraina cenkiniñ bütün iştirakçilerine teren ürmetimizni bildirip, köstergen mertligi ve fedakârlığıñızdan ayrette qalamız. Askerlerniñ – vaqtınca işğal etilgen Qırımdan kelip, Ukrainanı Donbasta imaye etken ve Qırımnı Rusiye işğalcilerinden qurtarmağa azırlanğan qırımtatarlarnıñ ve ortaqlarınıñ qaramanlığından ğururlanamız», – dep qayd etti Çubarov.
O, «Qırım Muhtar Cumhuriyeti ve Aqyar şeeri ile beraber Ukrainanıñ halqara seviyede tanılğan sıñırlarında topraq bütünliginiñ ğayrıdan tiklenmesini» tiledi.
Ukraina imayecisi künü resmiy şekilde 2014 senesinde qayd etilip başladı, beşinci prezident Petro Poroşenko buña dair buyruq çıqarğan edi. Bayram Rusiyeniñ Donbastaki silâlı istilâsı ve Qırım işğalinden soñ tesis etildi. 2015 yılında bu kün raatlıq künü oldı. Vatan imayecisi künü olaraq fevralniñ 23-ni belgilegen ferman Ukrainada lâğu etildi.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
