Kyivdeki Ukraina halq mimarcılığı ve turmuşı milliy müzeyinde oktâbrniñ 14-nde saat 13:00-da Ukraina imayecisi künü munasebetinen medeniy-bediiy tedbirler keçirilecek, qırımtatar arbiyleri iştirak etecek ve mukâfatlarını alacaq. Bu aqta «Qırım eviniñ» matbuat hızmeti bildirdi.
«Bu yıl Ukraina halq mimarcılığı ve turmuşı milliy müzeyi ile işbirligi çerçivesinde «Qırım evi» kontsert tedbirlerine «Qırım» programmasınen qoşula. Esas bayramlardan biri Ukraina imayecisi künü ola. Şu sebepten bu künü şarqta Ukrainanı imaye etken qırımtatar askerleri ve veteranlarını qutlaycaqmız», – dep aytıla haberde.
Qayd etilgenine köre, «Qırım eviniñ» tedbir programmasında:
- Qırımlı arbiylerni qutlap taqdirlev;
- «Qırım ailesi» oyun ansambliniñ çıqışları;
- «Usein Bekirov Triosınıñ» caz muzıkası;
- Ukrainada nam qazanğan artist Elzara Batalovanıñ yırları.
Bunıñnen beraber, kontsert programmasında Ukraina Devlet sıñır hızmetiniñ Ukraina yır ve oyun akademik ansambliniñ çıqışları; Ukraina halq artisti Anatoliy Gnatükniñ çıqışları; «Rozmariya» qadın ses ansambli, «Tsveteniye paporotnika» Horeografik miniatüra teatriniñ halq bediiy kollektivi, Ukrainada nam qazanğan artist Oksana Stebelskayanıñ çıqışları bar.
«Halq icadı meydançığı da olacaq, anda ebru, qına ustazları ders berecek; ukrain ve qırımtatar ustazlarınıñ yarmalığı ötkerilecek. Bu meydançıqta ukrainlerniñ toy merasimleri ve qırımtatar milliy oyunları kösterilecek», – dep aytıla haberde.
Müzey kirişi paralı olacaq, maska taqıluvı mecburiydir, tedbir ise Ukraina Sağlıq nazirliginiñ talapları ve Baş sanitar ekiminiñ tevsiyelerine riayet etilip keçirilecek.
Sentâbrniñ 24-nde Dniprodaki ATO Müzeyinde «İşğal reineleri» albomı ve sergisi taqdim etildi. O, «Qırım işğaliniñ reineleri olğan qırımtatar qorantalarına» bağışlandı.
