Bazarertesi künü, iyünniñ 3-nde, Ukrainada «Qırım – Ukrainadır» ve «Donbas – Ukrainadır» tasil merkezleri çalışıp başladı. Olarnıñ yardımınen vaqtınca işğal etilgen topraqlarda yaşağan mezurlar Ukraina aliy oquv yurtlarına ve zenaat-tehnik oquv yurtlarına qolay-qolay oqumağa kire bile. Tış mustaqil imtian (ZNO), Ukraina pasportı ve attestatı kerek olmaycaq.
Ukraina Tasil nazirligi bildirgenine köre, bu merkezlerniñ işi sentâbrniñ 27-ne qadar devam etecek.
Tasil ve İlim naziriniñ muavini Yuriy Raşkeviçniñ aytqanına köre, böyle tasil merkezleri Ukrainada 2016 senesinden berli çalışa.
«Bu müddet devamında qolaylaştırılğan kirüvden faydalanğan studentlerniñ sayısı bayağı arttı. 2016 senesi oqumağa kirgenler 1 biñden az edi, şimdi olarnıñ sayısı aman-aman 2 biñ oldı. Müimi şu ki, Donbas ve Qırım sakinleri tasil merkezleri vastasınen oqumağa kirse, Ukraina ve dünyada tanılğan diplomnı ala bile», – dep qayd etti Yuriy Raşkeviç.
«Qırım – Ukrainadır» merkezleri 8 regiondaki 35 oquv yurtunda açıldı: Odesa, Mıkolayıv, Zaporijjâ, Herson, Harkiv, Lviv, Dnipro ve Kyivde, dep qayd etti nazirlik. Merkezlerniñ tolu cedveli ve kontaktları mında bar.
Nazirlik tasil merkezleri yardımınen bücetke kirecek olğan Qırım ve Aqyar mezunları vesiqalarnı berecek künlerni aydınlattı.
Bakalavr bücetine kirüv (tibbiy, veterinar ya da farmatsevtik yöneliş magistri):
Vesiqalar iyülniñ 19-nda saat 12-ge qadar qabul etilecek,
Kiriş imtianları iyülniñ 19-na qadar olacaq,
Qabul etüv iyülniñ 22-nde saat 15-ke qadar kerçekleştirilecek.
11 sınıf esasında kiçik mütehassıs bücetine kirüv:
Vesiqalar iyülniñ 29-nda saat 18-ge qadar qabul etilecek,
Kiriş imtianları iyülniñ 28-ne qadar olacaq,
Qabul etüv avgustnıñ 4-nde saat 12-ge qadar kerçekleştirilecek.
9 sınıf esasında kiçik mütehassıs bücetine kirüv:
Vesiqalar iyülniñ 13-nde saat 13-ke qadar qabul etilecek,
Kiriş imtianları iyülniñ 21-ne qadar olacaq,
Qabul etüv iyülniñ 29-nda saat 18-ge qadar kerçekleştirilecek.
Soñki üç yıl devamında qırımlılarğa esas Ukrainadaki aliy oquv yurtlarına oqumağa kirmege yardım etken «Qırım – Ukrainadır» tasil merkezleriniñ sayısı aman-aman üç qat arttı, şimdi 35 danesi bar.
Nazirlikniñ malümatına köre, «Qırım – Ukrainadır» tasil merkezleriniñ 3 yıllıq işinde bu merkezler vastasınen oqumağa kirgenlerniñ sayısı eki qat arttı: 2016 senesi 153 qırımlı, 2017 senesi 204 qırımlı, 2018 senesi ise 227 insan oldı.
Daa evel Ukraina tasil ve İlim nazirligi Qırım ve Donbas abituriyentleri içün talimat derc etken edi.
