Ukraina Tış işler naziri Dmıtro Kuleba salı künü, mayısnıñ 25-nde, Türkiye Cumhuriyeti Tış işler naziri Mevlüt Çavuşoğlu ile «Qırım platforması» sammitine ketken azırlıq işlerini muzakere etti.
Ukraina nazirliginiñ matbuat hızmeti bildirgenine köre, Dmıtro Kuleba Türkiye tarafına Rusiyeniñ Qırım ilhaqını qanunlaştırmaq ıntıluvlarını tanımağanı içün ve Ukrainağa ait «Qırım platforması» teşebbüsine qol tutqanı içün teşekkürler bildirdi.
«Ukraina Qırım meselesinde printsipial olğan Türkiyege minnetdardır. Kyiv ve Ankara Qırım Ukraina olğanında birler. Böyle edi ve böyle olacaq. Rusiyeniñ vaqtınca yarımada işğalini qanunlaştırmaq ıntıluvları muvafaqiyetsiz olacaq», – dep qayd etti Ukraina naziri.
Mevlüt Çavuşoğlu, Türkiyeniñ Ukraina topraq bütünligi ve suverenitetine qol tutqanını bildirip, Türkiye «Qırım platforması» sammitinde ve ilerideki işte iştirak etmege azır, dep işandırdı.
«Türkiye naziri, Ukraina topraq bütünligine kösterilgen destek ve Rusiyeniñ qanunsız Qırım ilhaqını tanımama tek Ankaranıñ eski ve ardı-sıra siyaseti degil, Türkiye içün printsip işidir, dep qayd etti», – dep bildire Ukraina Tış işler nazirliginiñ matbuat hızmeti.
Rusiye Tış işler naziri Sergey Lavrov Rusiye ve Türkiyeniñ Qırım meselesinde fikirleri farqlı ola, dep qayd etken edi. O, Ankaranı yarımadanen bağlı «Ukraina teşebbüslerine qol tutqanında» yüzlep, bunı «Rusiye topraq bütünligine qast etüvnen» qıyasladı.
Bundan evel Ukraina prezidenti Volodımır Zelenskıy «Qırım platforması» sammitine 30 memleketniñ vekilleri kelecek, dep ayttı.
Ukraina prezidenti ofisiniñ reber muavini İğor Jovkva «Qırım platforması» boyunca halqara sammit Ukrainada 2021 senesi avgustnıñ 23-nde olacaq, dep bildirgen edi.
Rusiye Tış işler nazirliginiñ spikeri Mariya Zaharovanıñ aytqanına köre, Rusiye tarafı Ukraina teşebbüsinen keçirilecek Qırım platformasında iştirak etmege azır, amma meydançıqta yarımada problemleri muzakere etilmeli – suv teminlevinden naqliyatqa qadar.
Ukraina Tış işler naziriniñ birinci muavini Emine Ceppar «Dom» telekanalınıñ yayınında Ukraina Tış işler nazirligi avgustnıñ 23-nde olacaq «Qırım platformasında» iştirak etecegini tasdıqlağan memleket sayısını aydınlatmağa daa planlaştırmay, dep bildirdi. Onıñ aytqanına köre, bu qarar Rusiye tirengeni içün qabul etildi.
Latviya Seymi Qırımnı işğalden qurtaruv ve halqara seviyede tanılğan sıñırlarda topraq bütünligini ğayrıdan tiklev ğayretlerinde Ukrainağa qol tutmaq içün «Qırım platforması» deputatlar gruppasını qurdı.
«Qırım platforması»
Qırımnı işğalden qurtaruv halqara meydançığı (Qırım platforması) – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.
2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.
Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.
Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.
2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.
Ukraina prezidenti Volodımır Zelenskıy bildirgenine köre, Avropa Birliginiñ liderleri Avropa Birliginiñ Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.
Kreml, Qırım meselesi qapatıldı ve Rusiye onı halqara muzakerelerge almaycaq, dep bir qaç kere bildirgen edi.
