Ukraina Tış işler naziriniñ birinci muavini Emine Ceppar mayısnıñ 31-nde Montenegro Tış işler nazirliginiñ devlet kâtibi Lübomir Mişuroviçnen «Qırım platforması» sammitine azırlıq meselelerini muzakere etti, dep haber ete Ukraina Tış işler nazirliginiñ matbuat hızmeti.
Ukraina nazirliginiñ malümatına köre, Ceppar Montenegrolı zenaatdaşına yañı mesleat ve koordinatsiya formatı olaraq «Qırım platformasınıñ» maqsad ve vazifeleri aqqında malümat berdi.
«Qırımdaki demografik deñişmeler ve Rusiye asker sayısınıñ artması sebebinden pek qasevetlenemiz. BM Halqara mahkemesiniñ 2017 senesiniñ qararına baqmadan, Rusiye işğalci memuriyeti Qırımtatar Milliy Meclisiniñ faaliyetini yasaqlamağa devam ete ve vatandaşlarnıñ Ukraina tasiline irişimini ğayrıdan tiklemey», – dep bildire Cepparnıñ aytqanlarını nazirlik.
Onıñ aytqanına köre, «ukrain ve qırımtatarlarnıñ ana tilinde tasil, oquv yurtlarındaki er taraflı antiukrain propagandası, sekizi qanunsız apiste olğan qırımtatar vatandaş jurnalistlerine qarşı basqı» da qasevetlendire.
Montenegro Tış işler nazirliginiñ devlet kâtibi Lübomir Mişuroviç, memleketiniñ tış siyaseti deñişmey, dep bildirdi.
«Ukraina suvereniteti ve topraq bütünligine qol tutamız», – dep qayd etti Mişuroviç.
2020 senesi noyabr ayında Emine Ceppar Montenegro elçisi Dragitsa Ponorats ile körüşti ve Montenegro tarafını «Qırım platformasınıñ» işinde iştirak etmege davet etti.
Bundan evel Ukraina prezidenti Volodımır Zelenskıy «Qırım platforması» sammitine 30 memleketniñ vekilleri kelecek, dep ayttı.
Ukraina prezidenti ofisiniñ reber muavini İğor Jovkva «Qırım platforması» boyunca halqara sammit Ukrainada 2021 senesi avgustnıñ 23-nde olacaq, dep bildirgen edi.
Rusiye Tış işler nazirliginiñ spikeri Mariya Zaharovanıñ aytqanına köre, Rusiye tarafı Ukraina teşebbüsinen keçirilecek Qırım platformasında iştirak etmege azır, amma meydançıqta yarımada problemleri muzakere etilmeli – suv teminlevinden naqliyatqa qadar.
Ukraina Tış işler naziriniñ birinci muavini Emine Ceppar «Dom» telekanalınıñ yayınında Ukraina Tış işler nazirligi avgustnıñ 23-nde olacaq «Qırım platformasında» iştirak etecegini tasdıqlağan memleket sayısını aydınlatmağa daa planlaştırmay, dep bildirdi. Onıñ aytqanına köre, bu qarar Rusiye tirengeni içün qabul etildi.
Latviya Seymi Qırımnı işğalden qurtaruv ve halqara seviyede tanılğan sıñırlarda topraq bütünligini ğayrıdan tiklev ğayretlerinde Ukrainağa qol tutmaq içün «Qırım platforması» deputatlar gruppasını qurdı.
«Qırım platforması»
Qırımnı işğalden qurtaruv halqara meydançığı (Qırım platforması) – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.
2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.
Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.
Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.
2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.
Ukraina prezidenti Volodımır Zelenskıy bildirgenine köre, Avropa Birliginiñ liderleri Avropa Birliginiñ Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.
Kreml, Qırım meselesi qapatıldı ve Rusiye onı halqara muzakerelerge almaycaq, dep bir qaç kere bildirgen edi.
