Salı künü, iyünniñ 8-nde, Ukraina Tış işler naziriniñ birinci muavini Emine Ceppar Ukrainada iş ziyaretinen bulunğan Avropa tış faaliyet hızmetiniñ Rusiye, Şarqiy işbirligi, Orta Asiya, regional işbirligi ve OSCE idariy müdiri Mihael Zibert ile körüşip, «Qırım platforması» boyunca işbirligini muzakere etti.
Bu aqta Ukraina Tış işler nazirliginiñ matbuat hızmeti haber etti.
Qayd etilgenine köre, Zibert vazifege tayinlengen soñ ziyaret etken ilk çetel devleti Ukraina oldı.
«Mihael Zibert Avropa Birliginiñ «Qırım platformasına» faal qol tutqanını Qırımnı işğalden qurtaruv halqara ğayretlerini quvetleştirüvniñ müim aleti olaraq qayd etip, Avropa Birligi institutları reberleriniñ – Avropa Şurasınıñ prezidenti Şarl Mişel, Avropa Komissiyasınıñ prezident muavini Valdis Dombrovskis ve Avropa Birliginiñ üyken vekili Jozep Borrelniñ Kyiv sammitinde iştirak etecegini tasdıqladı», – dep aytıla haberde.
Taraflar Avropa Birliginiñ Rusiyeniñ Qırımnı ilhaq etüv ıntıluvını tanımama siyasetini yerine ketirüv vaziyetini muzakere etkenler.
«Emine Ceppar Rusiye Federatsiyasınıñ Ukrainağa ait yarımada işğalini qanunlaştırmaq ıntıluvlarına faal qarşılıq köstermek müim olğanını ve devam etken sıñırlav tedbirleriniñ pekitilmesi ve Avropa Birliginiñ vaqtınca işğal etilgen Qırımnen bağlı yañı aletler olmalı, dep ayttı», – dep qayd etti tış siyaset nazirligi.
Bundan ğayrı, Ceppar Rusiyege qarşı sanktsiyalarnen basqı yapmaq müim olğanını qayd etti.
«Ukraina tarafı, iyünniñ soñunda Avropa Şurasınıñ toplaşuvı neticesinde Avropa Birligi AB Rusiye Federatsiyasına qarşı aktual siyaset esaslarını tasdıqlar, dep bekley, olarnıñ arasında Rusiyeniñ Ukrainağa qarşı istilâ toqtatılması ve devletimizniñ topraq bütünligini ğayrıdan tiklev esas yer almalı», – dep qoştı Ukraina Tış işler nazirligi.
Mayısnıñ 20-nde Ukraina prezidenti Volodımır Zelenskıy «Qırım platforması» sammitine 30 memleketniñ vekilleri kelecek, dep ayttı. Onıñ bildirgenine köre, Rusiye «Qırım platformasını» pek ağır yanaşa.
Ukraina prezidenti ofisiniñ reber muavini İğor Jovkva «Qırım platforması» boyunca halqara sammit Ukrainada 2021 senesi avgustnıñ 23-nde olacaq, dep bildirgen edi.
Ukraina Tış işler naziriniñ birinci muavini Emine Ceppar «Dom» telekanalınıñ yayınında Ukraina Tış işler nazirligi avgustnıñ 23-nde olacaq «Qırım platformasında» iştirak etecegini tasdıqlağan memleket sayısını aydınlatmağa daa planlaştırmay, dep bildirdi. Onıñ aytqanına köre, bu qarar Rusiye tirengeni içün qabul etildi.
Rusiye Tış işler nazirliginiñ spikeri Mariya Zaharovanıñ aytqanına köre, Rusiye tarafı Ukraina teşebbüsinen keçirilecek Qırım platformasında iştirak etmege azır, amma meydançıqta yarımada problemleri muzakere etilmeli – suv teminlevinden naqliyatqa qadar.
Martnıñ 15-nde ise Rusiye Tış işler nazirliginiñ matbuat kâtibi Mariya Zaharova Kyivniñ Qırım işğalini toqtatmaq ıntıluvları qanunsız ola ve Rusiyeniñ eki subyekti olğan Qırım ve Aqyarğa qarşı istilâ telükesi olaraq qabul etile, dep bildirdi.
«Qırım platforması»
Qırımnı işğalden qurtaruv halqara meydançığı (Qırım platforması) – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.
2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.
Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.
Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.
2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.
Ukraina prezidenti Volodımır Zelenskıy bildirgenine köre, Avropa Birliginiñ liderleri Avropa Birliginiñ Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.
Kreml, Qırım meselesi qapatıldı ve Rusiye onı halqara muzakerelerge almaycaq, dep bir qaç kere bildirgen edi.
