Ukraina TİN dünya toplulığını mayısnıñ 21-nde işğal etilgen Qırımda İvan Yatskinge çıqarılğan ükümge cevap bermesine çağırdılar.
«2019 senesi Qırımda uydurılğan qabaatlardan tutulğan ağır hasta ukrain İvan Yatskinni rus işğalciler 11 yıl sert apis cezasına maküm etti. Rusiye quvetçileri oña qılındı, sağlığını ğayıp etmesiniñ sebepçisi oldı ve ukrain konsulı, mustaqil advokatlar ile onı körüştirmemek içüñ daima sebepler qıdırdı», – dep yazdı Ukraina TİN birinci muavini Emine Ceppar.
Ceppar bu qanunsız ükümni takbih etti ve halqara toplulıqnı işğal etilgen Qırımda insan aqlarınıñ bozulmasına cevap bermesine çağırdı.
«Rusiye Yatskin ve qanunsız tutulğan Ukraina vatandaşlarını deral azat etmek kerek», – qayd etti o.
Mayısnıñ 21-nde Rusiye nezaretinde olğan Qırımnıñ Yuqarı mahkemesi «devlet hainliginen» qabaatlanğan Qırım sakini İvan Yatskinge üküm çıqardı. Alla Hineviçniñ reisliginde qadılar kollegiyası İvan Yatskinni bir yıl sıñırlav ile 11 yıl sert apis cezasına mahküm etti. Advokat ükümni temyiz etecek.
Ukraina Yuqarı Radasınıñ insan aqları vekâletlisi Lüdmila Denisova İvan Yatskinniñ ukmüni takbih etti.
Yatskin «devlet hainliginen» qabaatlandı (Rusiye ceza qanunnamesiniñ 275 maddesi – QA). Bu dava boyunca bütün mahkeme oturışları qapalı keçirildi, mahkeme, dava materiallarında devlet sırı olğanına atfı ete edi.
Qırımnıñ Curçı rayonınıñ Aybar (Voykovo) köyüniñ sakini İvan Yatskin 2019 yılda oktâbr 16-sında tutuldı. Bu dekabr ayında belli oldı.
Rusiye tahqiqatı, Yatskin Qırımda olıp, UMT ile işbirlik yaptı ve «Rusiyeniñ devlet sırı» olğan malümatnı olarğa bildirdi, dep ayta.
Qırım.Aqiqatnıñ Ukraina telükesizlik hızmetine yollağan muracaat cevabında İvan Yatskin UTH ile işbirligi yapmadı, dep aytıla.
«Memorial» aq qorçalayıcı merkezi İvan Yatskinni siyasiy mabüs dep tanıdı.
