Ukraina TİN başı Dmıtro Kuleba Rusiyeni qırımtatarlarnıñ evlerinde tintüvler keçirilüvini ve olarnıñ tutuluvını toqtatmağa çağırdı. Onıñ fikrince, Rusiye böylece Ukrainanıñ Qırımnı işğalden azat etme ıntıluvı içün «suçsuz insanlardan açuvı ala».
Böyle sentâbrniñ 9-nda Kuleba brifing vaqtında Rusiye quvetçileriniñ Qırımda keçirgen yañı tintüvlerini ve insanlarnıñ tevqif etilüvini tefsir etti.
«Ruslarğa bir çağıruvnen muracaat etmege isteyim –oz aqılsızlığını köstermege toqtatıñız. Ukrainanıñ Qırım ve yarımadanıñ azat etilmesi oğrunda küreşini toqtatıp olamasañız, suçsuz adamlardan açuvını almañız. Bu qadar küçlü olsañız, suçsuz adamlarnı taqip etmeñiz, devletlerara munasebetler seviyesinde cevap beriñiz», – dedi Kuleba.
O, Nariman Celâl ve diger qırımtatar faallerine qarşı açılğan yañı davalarğa siyasiy ve uydurma dedi ve Ukraina tutulğan ve tevqif etilgen Qırım sakinleriniñ azat etilmesi oğrunda küreşecegine inandırdı.
«Başqa iç bir yorav ola bilmez, şu tintüvler ve tutuvlar Ukraina tarafından «Qırım platforması» sammitiniñ muvafaqiyetli keçirilmesi içün intiqamdır. «Qırım platforması» sammitiniñ keçirilmesine qarşı tekşil etken kapmaniyası muvafaqiyetsizlikke oğrağan soñ Rusiye eñ yahşı yapıp olğanını qullandı –basqılarnı. Öz hataları içün suçsuz adamlarnı, qırımtatarlarnı çekiştire ve qorantlarınıñ başına belâ ketire. Bütün qabaatlavlar saçmadır, siyasiy ve uydurmadır», – dedi Kuleba.
Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Olarnıñ arasında qırımtatar siyasetçisi ve faali Nariman Celâl bar. Eki doğmuş qardaşlar Aziz ve Asan Ahtemovlar eki ayğa apiske alındı, Azizniñ babası Eskender Ahtemov 10 künge apiske alındı. Asan Ahtemovnıñ qardaşı Arsen 15 künge apiske alındı. Kreml kontrolindeki Kiyev rayon mahkemesi qırımtatar siyasetçisi ve faali Nariman Celâlnı eki ayğa – noyabrniñ 4-ne qadar apiske aldı. Nariman Celâl bütün qabaatlavlarnı inkâr ete.
Bundan ğayrı, Rusiye polisi sentâbrniñ 4-nde Rusiye FSBsiniñ binası ögünde tutulğan qırımtatarlarğa qarşı 58 memuriy protokol tizdi.
Qırımda FSB binası ögünde insanlar tutuldı: neler oldı (+foto)
Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Olarnıñ arasında qırımtatar siyasetçisi ve faali Nariman Celâl bar. Eki doğmuş qardaşlar Aziz ve Asan Ahtemovlar eki ayğa apiske alındı, Azizniñ babası Eskender Ahtemov 10 künge apiske alındı. Asan Ahtemovnıñ qardaşı Arsen 15 künge apiske alındı. Kreml kontrolindeki Kiyev rayon mahkemesi qırımtatar siyasetçisi ve faali Nariman Celâlnı eki ayğa – noyabrniñ 4-ne qadar apiske aldı. Nariman Celâl bütün qabaatlavlarnı inkâr ete.
Advokat Ayder Azamatovnıñ Qırım.Aqiqatqa bildirgenine köre, Aqmescitteki mahkeme Qırımda raatlıq künleri Rusiye quvetçileriniñ tintüvleri vaqtında tutulğan Şevket UseinovveEldar Odamanovnı sentâbrniñ 6-nda Rusiye Memuriy uquq bozuluvları kodeksiniñ 19.3 maddesine istinaden (polis, arbiy, FSB organları hadiminiñ qanuniy emrine riayet etmeme) 14 ve 15 künge apiske aldı.
Sentâbrniñ 7-nde TASS Rusiye malümat agentilgi Rusiye FSB-sine atfı etip, Aqmescit civarındaki Anğara (Perevalnoye) köyü yaqınlarında gaz borusında diversiya yapqanından şübheli sayılğanlar qabaatını itiraf etkenler, dep bildirdi. FSB yayınlağan videoda eki ekrek kimden talimat alğanlarını ve Anğara köyünde gaz borusınıñ patlatılmasını nasıl teşkil etkenlerini tafsilâtlı aytıp berdi.
FSB, diversiyanı Ukraina Mudafaa nazirliginiñ Baş istihbarat idaresi teşkil etti, dep israr ete.
Ukraina Mudafaa nazirliginiñ baş istihbarat idaresi Rusiye FSBsiniñ qabaatlavını «bir maqsadı olğan provokatsiya» olaraq köre.
Ukraina akimiyeti qırımtatar faalleriniñ tutuluvı ve apiske alınuvını avgustnıñ 23-nde Kyivde keçirilgen «Qırım platformasınıñ» sammitinen bağlay.
Ukraina ombudsmanı Lüdmila Denisova Qırımda insanlarnıñ apiske alınması sebebinden BM İnsan aqları Yuqarı komissarı Michelle Bacheletke muracaat etti.
Sentâbrniñ 3-4-nde Qırımdaki faallerniñ evlerinde keçirilgen tintüvler ve tutuvlardan soñ Qırım Muhtar Cumhuriyeti ve Aqyar prokuraturası cinaiy tahqiqat başlattı.