Ukraina TİN, «Rusiye Federatsiyası ve işğal etilgen Qırımda qanunsız sürette apis etilgen» Ukraina vatandaşlarına bağışlanğan «Boysunmağanlar» leyhasını başlattı.
Nazirlikte bildirgenlerine köre, leyha «apishanelerde siyasiy mabüsler tarafından yazılğan açıq mektüpleriniñ» yayınlanmasını közde tuta, dep haber ete Azatlıq Radiosı.
Leyhanıñ birinci qaramanı vatandaş jurnalisti Osman Arifmemetov oldı.
«Tevqif etilmezden evel o, işğal etilgen Qırımda qırımtatarlarnıñ qaçırıluvını ve evlerinde keçirilgen tintüvlerni açıqlay edi. Bugünde o, uydurılğan qabaatlardan sebep 20 yıl apis cezasına mahküm etile bile», – dep yazıla TİN-niñ malümatında.
Evel Ukraina Tış işler naziriniñ birinci muavini Emine Ceppar, ukrain diplomatları insanlarnıñ ikâyeleri yardımınen Qırımdaki basqılarğa diqqat çekmek isteyler, dep bildirdi.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faal tutulğan edi. Tutulğanlar arasında qırımtatar cemaat jurnalistleri Rustem Şeyhaliyev, Osman Arifmemetov ve Remzi Bekirov bar ediler.
2019 senesi martnıñ 27-nde ve 28-nde Aqmescitniñ rayon mahkemesi bütün tutulğanlarnı apiske aldı.
OSCE kütleviy haber vastalarınıñ serbestligi vekili Harlem Désir martnıñ 27-nde Qırımda keçirilgen kütleviy tintüvlerden soñ «Qırım birdemligi» faalleriniñ apiske alınuvını takbih etip, olarnıñ Rusiye SİZOsından acele azat etilüvine çağırğan edi.
Rusiye Tış işler nazirligi OSCE kütleviy haber vastalarınıñ serbestligi vekili Harlem Désirniñ apiske alınğan «Qırım birdemliginiñ» faallerini, Qırımdaki vatandaş jurnalistlerini azat etmek çağıruvları «şaşıra», dep bildirdi.
«Memorial» aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.
