Ukraina Tış İşler Nazirliginiñ başı Vadım Prıstayko İranda urulğan ukrain uçağı içün ivaz etüviniñ perspektivaları aqqında aytıp berdi, bildire Azatlıq Radiosı.
"İvaz etüv meselesi de muzakere etilecek. Amma bunı tafsilâtlıca keççe adliyeciler muzakere etecek. Añlaudırsıñız, onıñ bir qaç basamağı olacaq. Birinci basamaq - sigorta şirketleri ve ava şirketi bergen ivazlar, soñra daa yüksek seviyede - İran tarafınıñ ivazları... İnfratertip nazirinen semereli muzakere olacağında şübelenem, bunıñ içün muzakerelerde adliye şirketleri iştirak etmeli, amma biz bugün toplaşuvda yapacaq iyasiy itevsiz bular yapılmaz", - dedi nazir yanvarniñ 20-sinde Kyivde matbuat konferentsiyasında.
«Borıspil» halqara ava limanında İranda tüşürilgen Ukraina halqara ava yolları uçağında elâk olğanlarnen vedalaşuv merasimi keçti. Qaza neticesinde elâk olğan 11 ukrainalınıñ naaşları yanvarniñ 19-nda saba uçaqnen ketirildi.
Ukraina Tış işler nazirligi, İranda Ukraina uçağınıñ tüşürilüvi neticesinde elâk olğan ukrainalılar cesetleriniñ identifikatsiyası yekünlendi, dep bildirgen edi.
«Ukraina halqara ava yolları» ava şirketiniñ PS752 seferli Boeing 737-800NG uçağı yanvarniñ 8-nde saba Tehrandan Kyivge yol alıp, İran paytahtınıñ halqara ava limanından çıqıp tüşti. 176 insan elâk oldı, 167-si yolcu ve 9 ekipaj azası edi. Elâk olğanlar arasında – 11 Ukraina vatandaşı (ekipaj azaları ve 2 yolcu).
Uçaq 2016 senesi yapıldı. Şirketniñ bildirgenine köre, bir problemi yoq edi ve yanvarniñ 6-nda uçuştan evel tehnik teşkerüvi yapıldı.
Daa evel bir sıra kütleviy haber vastası ABD ve diger memleketlerniñ istihbarat menbalarına esaslanıp, Ukraina halqara ava yolları ava şirketiniñ «Boeing» uçağı İran raketasınen tüşürildi, dep bildirdi, daa soñra bunı Kanada ve Büyük Britaniya liderleri de ayttı. İran akimiyeti 176 insan elâk olğan Ukraina uçağı tüşürilgenine dair versiyanı inkâr etken edi.
