Ukraina İçki İşler Nazirligi, İranda uçaq qazasında elâk olğan ukrainlerniñ cesedleriniñ identifikatsiyası yekünlendi, dep bildire Azatlıq Radiosı.
"Bugün Tehranda bulunğan İİN-niñ ekspertleri elâk olğan 11 Ukraina vatandaşınıñ episiniñ DNK profilini aldı. Olarnıñ Ukrainağa yollanılması azırlana. İlk alınğan malümatqa köre, elâk olğanlarnıñ cesetlerini 2020 senesi yanvar 19-ınace yiberecek olalar",- denile beyanatta.
İİN hatırlattı ki, müessiseniñ 15 qurtarıcısı, dört tahqiqatçısı ve üç eksperti, ukrain "Boeing"iniñ qaaza sebepleini tayinlemege İran zenaatdaşlarına yardım ete.
«Ukraina halqara ava yolları» ava şirketiniñ PS752 seferli Boeing 737-800NG uçağı yanvarniñ 8-nde saba Tehrandan Kyivge yol alıp, İran paytahtınıñ halqara ava limanından çıqıp tüşti. 176 insan elâk oldı, 167-si yolcu ve 9 ekipaj azası edi. Elâk olğanlar arasında – 11 Ukraina vatandaşı (ekipaj azaları ve 2 yolcu).
Uçaq 2016 senesi yapıldı. Şirketniñ bildirgenine köre, bir problemi yoq edi ve yanvarniñ 6-nda uçuştan evel tehnik teşkerüvi yapıldı.
Daa evel bir sıra kütleviy haber vastası ABD ve diger memleketlerniñ istihbarat menbalarına esaslanıp, Ukraina halqara ava yolları ava şirketiniñ «Boeing» uçağı İran raketasınen tüşürildi, dep bildirdi, daa soñra bunı Kanada ve Büyük Britaniya liderleri de ayttı. İran akimiyeti 176 insan elâk olğan Ukraina uçağı tüşürilgenine dair versiyanı inkâr etken edi.
