Ukraina TİN spikeri Oleg Nikolenko, Büyük Britaniyanıñ Qırım sebebinden Rusiyege qarşı qoyulğan sanktsiyalarınıñ “yımşatıluvı” aqqında Rusiye haber vastaları tarqatqan malümatnı tefsir etti.
“AB azası olmağan devlet olaraq, Birleşken Qırallıq Avropa sanktsiyalar rejimleriniñ, şu cümleden Rusiye ile bağlı olğanlarını da, öz milliy qanunlarına köre deñiştirüv protsedurasını başlattı. Büyük Britaniya Maliye nazirliginiñ Qırım limanları içün umumiy litsenziyası, AB Şurasınıñ 2014/145/CFSP qararından keri çekildi. Böyle bir şey endi 2017 senesinden berli bar. Evel de böyle bir şeyler bar edi. İç bir diger şey aqqında söz ketmey”, – dep yazdı o.
O, 2021 senesi yanvarnıñ 1-nden Ukraina ve Büyük Britaniya arasında strategik işbirlik aqqında añlaşma quvetini alğanını da hatırlattı.
“Birleşken Qırallıq, Ukrainanıñ dünyadaki eñ küçlü ve eñ izçen ortaqlarından biri olıp qala, Rusiye tecavuzına qarşılıqta devletimizniñ suvereniteti ve topraq bütünligine siyasiy ve ameliy destek bildirmege devam ete. Bundan ğayrı, Büyük Britaniya Rusiyege qarşı sanktsiyalarnı saqlap qalğan ve yañılarını qoyğan dünya liderlerinden biridir. Demek ki, sanktsiyalarnıñ yımşatıluvı aqqında bildirmelerni Rusiyeniñ nevbetteki yalanları olaraq sayamız”, – dep yazdı Nikolenko.
Ukrainadaki Büyük Britaniya elçisi Melinda Simmons, Qırımnı işğal etkeni içün Rusiye Federatsiyasına qarşı qoyulğan sanktsiyalarnıñ “yımşatıluvı” aqqında bir sıra kütleviy haber vastası tarqatqan malümatqa “sahte” dedi.
Evel, Büyük Britaniya Qırım sebebinden Rusiyege qarşı qoyulğan sanktsiyalar sırasına deñişmeler kirsetti, dep haber etilgen edi.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
