Ukrainadaki Büyük Britaniya elçisi Melinda Simmons, Qırımnı işğal etkeni içün Rusiye Federatsiyasına qarşı qoyulğan sanktsiyalarnıñ “yımşatıluvı” aqqında bir sıra kütleviy haber vastası tarqatqan malümatqa “sahte” dedi. Bu aqta elçilikniñ Facebooktaki beyanatında yazıla.
“Büyük Britaniya Ukrainanıñ topraq bütünligine qoltuta ve Qırımnıñ qanunsız işğali içün Rusiyege qarşı qoyulğan sanktsiyalarğa riayet ete. Bu sanktsiyalarnıñ yımşatıluvı aqqındaki beyanat sahtedir. Qırımnıñ deñiz limanları içün Britaniya maliye nazirligi alıp bergen umumiy litsenziya AB Şurasınıñ №269/2014 qararınıñ 6a maddesine binaen maqsatlarnı ve litsenziyanıñ satır başındaki mündericesini amelge keçire, yani, demek, analogik siyasetiniñ areketini saqlay”, – dep yazıla bildirmede.
Evel, Büyük Britaniya Qırım sebebinden Rusiyege qarşı qoyulğan sanktsiyalar sırasına deñişmeler kirsetti, dep haber etilgen edi.
Şimdilik Ukrainanıñ muvafıq idareleriniñ bu malümatqa cevabı yoq.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
