«Yedinaya Rossiya» firqasınıñ azası İgor Kuçerâvıy Rusiye işğal etken Aqyardan esas Ukrainağa Ukraina pasportını almaq içün kete edi. Bu aqta dekabrniñ 4-nde Ukraina telükesizlik hızmetiniñ matbuat hızmeti haber ete.
«Vaqtınca işğal etilgen Qırım Muhtar Cumhuriyetiniñ memuriy sıñırında Ukraina telükesizlik hızmetiniñ qarşı istihbaratçıları yarımada ilhaqınıñ faal tarafdarı, «Yedinaya Rossiya» Rusiye ükümran siyasiy firqasınıñ azası İgor Kuçerâvıynı tuttı», – dep aytıla haberde.
Mahsus hızmetniñ qarşı istihbaratçıları «Yedinaya Rossiya» firqasınıñ Aqyar bölük azası Ukraina pasportını almaq içün esas Ukrainağa kelmege planlaştıra degen malümatnı aldı, dep bildirdi.
«Ukraina mahsus hızmeti Kuçerâvıynı Ukrainağa qarşı baqışlarınen belli. 2014 senesi «Avtokanal Sevastopolâ» cemaat teşkilâtınıñ iştirakçisi olıp, o, Rusiyeniñ Qırım işğaline faal sürette yardım etken edi. Aqyardaki blokpostlar ve cemaat nizamını qoruvnen bağlı teşkiliy işlernen alâqası bar edi», – dep aytıla haberde.
Kuçerâvıy Rusiye Mudafaa nazirliginiñ «Qırımnı qaytaruv medali» ve Rusiye FSBsiniñ «Rusiye mahsus hızmetleriniñ veteranları Qırım ve Aqyar imayecilerine» yubiley işaretinen mukâfatlandırılğan edi.
UTH malümatına köre, Ukraina Ceza kodeksiniñ 110 maddesiniñ 1-inci qısmına (Ukraina topraq bütünligi ve toqunılmazlığına qast etüv) istinaden Kuçerâvıyge şübhelengenine dair bildirüv meselesi al etile. Tahqiqat tedbirleri devam ete.
ATR qırımtatar telekanalınıñ saibi Lenur İslâmov, Qırım ve Herson vilâyetiniñ memuriy sıñırındaki «Kalançak» keçiş noqtasında Ukraina telükesizlik hızmeti «Yedinaya Rossiya» firqasınıñ azası İgor Kuçerâvıynı tuttı, dep bildirdi.
UTH ve Ukraina Devlet sıñır hızmeti bu malümatnı resmiy şekilde tasdıqlamağan ediler.
Kuçerâvıy ve imayesi bunı daa izaatlamadılar.
İgor Kuçerâvıy «Yedinaya Rossiya» firqasınıñ ilkingi bölüginiñ kâtibi ola, ilhaq etilgen Aqyarda «Yedinaya Rossiya» firqasınıñ regional bölükniñ siyasiy şura erkânına kirmekte.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».
