Qırım ve Herson vilâyetiniñ memuriy sıñırındaki «Kalançak» keçiş noqtasında Ukraina telükesizlik hızmeti «Yedinaya Rossiya» firqasınıñ azası İgor Kuçerâvıynı tuttı. Bu aqta ATR qırımtatar telekanalınıñ saibi Lenur İslâmov Facebookta haber etti.
«Bu mahlüq saba işğal etilgen Qırımdan esas Ukrainağa çıqtı, pasport almaq içün, Kalançak keçiş noqtasından, bugün», – dep yazdı İslâmov.
İslâmovnıñ malümatı resmiy şekilde şimdilik tasdıqlanmadı.
Ukraina telükesizlik hızmeti bu vaziyetni izaatlamağa azır degil. Qırım.Aqiqatnıñ Küçerâvıy kerçekten tutuldımı degen sualine UTH spikeri Olena Ğıtlânska al-azırda tahqiqat tedbirleri keçirile, dep bildirdi.
Ukraina Devlet sıñır hızmeti «Kalançaktaki» tutuv aqqında malümatnı teşkere.
İgor Kuçerâvıy «Yedinaya Rossiya» firqasınıñ ilkingi bölüginiñ kâtibi ola, ilhaq etilgen Aqyarda «Yedinaya Rossiya» firqasınıñ regional bölükniñ siyasiy şura erkânına kirmekte.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».
