Birleşken Milletlerniñ tasil, ilim ve medeniyet meseleleri teşkilâtı işğal etilgen Qırımda vaziyet fenalaşqanını qayd ete. Bu aqta yarımadanıñ vaziyetine dair 10-uncı malümat körüşüvinde aytıldı, dep haber ete Ukraina Tış işler nazirligi.
Müessise malümatına köre, körüşüvde BM insan aqları Yuqarı komissarı, OSCE matbuat serbestligi meseleleri vekili, Yadikârlıqlar ve tarihiy yerlerni qoruv halqara şurası, Amnesty International ofisleriniñ maruzalarında insan aqları bozuvları, milliy azlıqlar, matbuat serbestligi, jurnalistlerniñ telükesizligi, medeniy miras qorçalavına zulum etüv, ana tilinde tasil aluv imkânından marum etüv aqqında aytıldı.
33 iştirakçi memleket UNESCO kâtibiyetini işğal etilgen Qırımdaki vaziyetniñ doğru monitoringiniñ birinci etapını kerçekleştirmege devam etmesine çağırdı.
«Bu, monitoringniñ ekinci etapını vaqtınca işğal etilgen yarımadada keçirmege yardım etecektir», – dep aytıla haberde.
Tış işler naziriniñ sabıq muavini Serğiy Kıslıtsâ Parijde UNESCO Baş konferentsiyasınıñ 40-ıncı sessiyasında çıqışta bulunıp, Rusiyeniñ Qırımda yapqanları Hersones ve Bağçasaraydaki Han sarayı içün «ciddiy telüke» ola, dep bildirdi.
Qırım işğalinden soñ Rusiye Qırımda medeniy ve tarihiy emiyeti olğan bütün obyektlerni öz yurisdiktsiyası altına aldı. Kyiv, olar Ukraina halqına ait olğanını israr etip, mezkür obyektlerni UNESCO imayesi altına almağa rica ete.
UNESCO Dünya mirası cedveline işğal altındaki Qırımnıñ «Tavrik Hersones» qoruğı kirmekte. Cedvelge kirsetilecek namzetler arasında Bağçasaraydaki Hanlar sarayı, Sudaqtaki Ceneviz qalesi, Qırım astrofizik observatoriyası, Manğup Qale, Eski Kermen ve Çufut Qale barlar.
