Link açıqlığı

Saatnıñ esas haberi

Rusiyeniñ areketleri Hersones ve Han sarayı içün «ciddiy telüke» ola – Kıslıtsâ


Tış işler naziriniñ muavini Serğiy Kıslıtsâ Rusiyeniñ Qırımdaki areketleri Hersones ve Bağçasaraydaki Hanlar sarayı içün «ciddiy telüke ola», dep ayttı. Bu aqta o, Parijde UNESCO Baş konferentsiyasınıñ 40-ıncı sessiyasında çıqışta bulunıp bildirdi.

«İşğalci akimiyetniñ viran etici areketleri tarihiy ve medeniy degerliklerni, Ukraina medeniy qazançlarınıñ aslını, hususan Tavrik Hersones qadimiy şeeri ve vaqtınca işğal etilgen Qırımda Bağçasaraynıñ Han sarayını saqlap qaluv içün ciddiy telüke ola», – dep bildire Kıslıtsânıñ aytqanlarını «Ukrinform».

Ukraina vekili, «Qırım ilhaqı neticesinde yarımadada insan aqları ve esas serbestlikleri kütleviy ve sistematik sürette bozulmağa devam ete», dep hatırlattı.

Onıñ aytqanına köre, Qırımdaki dünya medeniy mirasını saqlamaq içün UNESCO imayesi altında yapılğan areketler halqara monitoring mehanizmleriniñ kirişine izin berilmegeninen blok etile. Bu ise «işğalci akimiyet tarafından halqara uquq ve BM Baş Assambleyasınıñ bunıñnen bağlı qararlarınıñ sert bozuluvı ola».

Daa evel UNESCO, teşkilâtnıñ baş müdiriniñ Rusiye işğal etken Qırımda tasil, ilim, medeniyet, malümatnı tarqatuv ve kütleviy haber vastalarınıñ iş vaziyetine dair yañı maruzasını aydınlattı.

Qırım işğalinden soñ Rusiye Qırımdaki medeniy ve tarihiy emiyeti olğan bütün obyektlerni öz yurisdiktsiyası altına aldı. Kyiv, olar Ukraina halqına ait olğanını israr etip, mezkür obyektlerni UNESCO imayesi altına almağa rica ete.

UNESCO Dünya mirası cedveline işğal altındaki Qırımnıñ «Tavrik Hersones» qoruğı kirmekte. Cedvelge kirsetilecek namzetler arasında Bağçasaraydaki Hanlar sarayı, Sudaqtaki Ceneviz qalesi, Qırım astrofizik observatoriyası, Manğup Qale, Eski Kermen ve Çufut Qale barlar.

XS
SM
MD
LG