Ukraina vaqtınca işğal etilgen topraqlarınıñ reintegratsiya meseleleri nazirligi web saytınıñ qırımtatar versiyasınıñ test rejiminde açtı, dep bildire.
«Tamır halqlarnıñ tiline qol tutuv ve inkişaf çerçivesinde Reintegratsiya nazirligi tarafından atılğan adımlardan biri resmiy saytlarınıñ qırımtatar tiline tercime etmesi oldı. Bu qarar qırımtatar tiliniñ inkişaf kontseptsiyası ceetinden müim ola ve «tamır halqlar» qanunınıñ leyhasını yerine ketirmek içün kerek», – dep bildirdi müessise.
Nazir muavini Snaver Seythalilev, müessiseniñ maqsadı «devlet tilinen beraber Ukraina tamır halqları tilleriniñ yaşayışnıñ bütün saalarında er taraflama inkişafını ve qullanuvını temin etmek» ola, dep qayd etti.
Qayd etilgenine köre, şimdilik olğan malümat tercime etile ve qırımtatarca yañı malümat qoyula.
2-3 ay içinde, bütün tehnik işler bitken soñ, sayt tolusınen çalışıp başlaycaqtır.
Aprelniñ 1-nde Ukrainanıñ vaqtınca işğal etilgen topraqlarınıñ reintegratsiyası ve içtimaiy siyaset meseleleri ükümet komitetiniñ toplaşuvında qırımtatar tiliniñ inkişaf kontseptsiyasınıñ leyhasına qol tutqanlar.
Ukraina reintegratsiya nazirligi Google LLC korporatsiyasına muracaat etip, qırımtatar tilini Google Translate servisine kirsetmege rica etti. Nazirlik Duolingo şirketine – çetel tillerini ögrenüv platformasına muracaat etip, olarnıñ servisi esasında qırımtatar tili kursını başlatmağa teklif etti.
