Ukraina TİN başı Dmıtro Kuleba, Ukraina başlıqlarınıñ Qırımnıñ işğali mevzusında Qırım platformasınıñ faaliyetke keçirilmesi ile toqtamaycağını, bu meydançıqnıñ açılmasına bağışlanğan halqara sammitniñ ise «Rusiyeniñ Qırım yönelişinde mağlubiyetini» köstergenini qayd etti.
Bunı o avgustnıñ 26-nda birifing vaqtında ayttı.
Kuleba, Kyivdeki «Qırım platorması» sammitinden soñ Beyannameniñ imzalanmasını hatırlattı.
«Bu vesiqanıñ diger iştirakçilerniñ oña qoşulması baqımından keñleştirmek üzerinde çalışmağa devam etecekmiz. Halqara ortaqlar, Qırım platformasınıñ bu seviyede faaliyetke ketirilmesiniñ Rusiye içün Qırım yönelişinde büyük bir mağlübiyet olğanını tasdıqladılar. Ukraina Qarımnı qaytarmağance toqtamaz», – dedi Ukraina TİN başı.
O, Qırım platformasınıñ dünyada ve Rusiyede emsalsiz bir akis amelniñ sebebi olğanını dedi.
«Qırım platformasını yaratıp, 2014 senesi bu mevzuda halqara iş birligi formatı yaratılmağan tarihiy hatanı tüzettik. Bu qolay degil edi. Eñ müimi, qurban statusından, qurtarıcı statusına doğru adımlaymız. Ukrainanı tış siyasette başqa bir şekilde kösterip başlaymız», – dedi Kuleba.
Kyivde avgustnıñ 23-nde «Qırım platformasınıñ» birinci sammitinde iştirak etken 43 memleket ve halqara teşkilât Ukraina topraq bütünligini halqara seviyede tanılğan sıñırlarda ğayrıdan tiklemege çağırğan ortaq Beyannameni imzaladı.
Ukraina Tış işler naziri Dmıtro Kuleba sammitte qabul etilecek beyannamağa temsilcileri Kyivge kelmegen devletler qoşula bile, dep bildirgen edi.
Rusiye sammit keçirilüvine qarşı naralızıq bildirgen edi. Moskva tedbirni «şabaş» dep adlandırdı ve iştirakçilerini aqibetler bekley, dep qorquza. Forum başlamazdan evel Rusiye akimiyeti Ukraina Tış işler naziri Dmıtro Kuleba ve Milliy telükesizlik ve mudafaa şurasınıñ kâtibi Oleksiy Danilovğa qarşı şahsiy sanktsiyalar kirsetti.
Rusiye kontrolindeki «Qırım platformasını» ve avgustnıñ 23-nde Kyivde olıp keçken sammitini «Ukraina sakinlerine Qırımnı işğalden qurtaruv faaliyetini köstermek» içün «informatsion fon» dep adlandırdı.
«Qırım platforması»
Qırımnı işğalden qurtaruv halqara meydançığı (Qırım platforması) – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.
2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.
Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.
Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.
2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.
Ukraina prezidenti Volodımır Zelenskıy bildirgenine köre, Avropa Birliginiñ liderleri Avropa Birliginiñ Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.
Kreml, Qırım meselesi qapatıldı ve Rusiye onı halqara muzakerelerge almaycaq, dep bir qaç kere bildirgen edi.
