Ukraina prezidentiniñ Qırım Muhtar Cumhuriyetindeki temsilciligi Ukraina akimiyeti Qırımnı işğalden qurtarmaq içün elinden kelgenini yapacaq, dep bildirdi. Bu aqta temsilcilikniñ Facebook saifesinde aytıla.
Müessise Qırımda Rusiye akimiyeti qırımtatar halqınıñ ve Qırımtatar Milliy Meclisiniñ vekillerini taqip etmege devam ete, dep qayd etti.
«Qırımtatar Milliy Meclisi reisiniñ birinci muavini Nariman Celâlnıñ ve ağa-qardaş Asan ve Aziz Ahtemovlarnıñ qabaatlavı boyunca daa bir «mahkeme oturışuvı» qırımtatar halqınıñ temsiliy organlarını Qırımdan quvuv siyasetiniñ daa bir adımı, vatandaş faalligini bastıruvnıñ daa bir aktı ola», – dep aytıla temsilcilikniñ beyanatında.
Olarnıñ fikirince, Qırımda Nariman Celâlnıñ taqip etilüvi onıñ cemaat ve siyasiy faaliyetinen bağlı, hususan «Qırım platforması» sammitiniñ çeşit meydançıqlarında spiker olaraq iştirak etüvi.
Temsilcilik Nariman Celâlğa Aqmescitniñ SİZOsından yazğan mektüplerinde Ukraina halqınıñ Rusiyege qarşı küreşine qoltutuv sözleri içün teşekkürler bildirdi.
«Rusiye Federatsiyasını daa bir kere repressiyalarnı toqtatmasına ve vaqtınca işğal etilgen Qırımda siyasiy baqışları, fikirleri ve inançları içün Ukraina vatandaşlarınıñ taqip etilüvinden vazgeçmesine çağıramız. Em de BM Halqara mahkemesiniñ 2017 senesi «Ukrainanıñ Rusiye Federatsiyasına qarşı» davası boyunca buyruğını yerine ketirmesine çağıramız, işbu ferman vaqtınca tedbir, hususan qırımtatarlarnıñ menfaatlarını temsil etüv sıñırlavları, şu cümleden Qırımtatar Milliy Meclisiniñ faaliyetini yañıdan başlatuvnen bağlı», – dep aytıla temsilcilikniñ haberinde.
Aqmescit SİZOsında tutulğan Nariman Celâl Rusiyeniñ Ukrainağa silâlı ücüminen bağlı Ukraina halqına muracaat etti.
Rusiye kontrolindeki Qırım Yuqarı mahkemesi qırımtatar siyasetçisi ve faali Nariman Celâl ve ağa-qardaş Aziz ve Asan Ahtemovlarnıñ apiste qaluv müddetini 2022 senesi iyülniñ 26-na qadar uzattı.
Anğara köyündeki «gaz borusında diversiya» davası
Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Olar arasında qırımtatar siyasetçisi ve faali Nariman Celâl bar. Eki doğmuş qardaşlar Aziz ve Asan Ahtemovlar eki ayğa apiske alındı, Azizniñ babası Eskender Ahtemov 10 künge apiske alındı. Asan Ahtemovnıñ qardaşı Arsen 15 künge apiske alındı. Kreml kontrolindeki Kiyev rayon mahkemesi qırımtatar siyasetçisi ve faali Nariman Celâlnı eki ayğa – noyabrniñ 4-ne qadar apiske aldı. Nariman Celâl bütün qabaatlavlarnı inkâr ete.
Sentâbrniñ 7-nde TASS Rusiye malümat agentilgi Rusiye FSB-sine atfı etip, Aqmescit civarındaki Anğara (Perevalnoye) köyü yaqınlarında gaz borusında diversiya yapqanından şübheli sayılğanlar qabaatını itiraf etkenler, dep bildirdi. FSB yayınlağan videoda eki ekrek kimden talimat alğanlarını ve Anğara köyünde gaz borusınıñ patlatılmasını nasıl teşkil etkenlerini tafsilâtlı aytıp berdi.
FSB, diversiyanı Ukraina Mudafaa nazirliginiñ Baş istihbarat idaresi teşkil etti, dep israr ete.
Ukraina Mudafaa nazirliginiñ baş istihbarat idaresi Rusiye FSBsiniñ qabaatlavını «bir maqsadı olğan provokatsiya» olaraq köre.
Ukraina akimiyeti qırımtatar faalleriniñ tutuluvı ve apiske alınuvını avgustnıñ 23-nde Kyivde keçirilgen «Qırım platformasınıñ» sammitinen bağlay.
Ukraina ombudsmanı Lüdmila Denisova Qırımda insanlarnıñ apiske alınması sebebinden BM İnsan aqları Yuqarı komissarı Michelle Bacheletke muracaat etti.
Sentâbrniñ 3-4-nde Qırımdaki faallerniñ evlerinde keçirilgen tintüvler ve tutuvlardan soñ Qırım Muhtar Cumhuriyeti ve Aqyar prokuraturası cinaiy tahqiqat başlattı.
