Ukraina prezidentiniñ Qırım Muhtar Cumhuriyetindeki daimiy temsilciligi, Rusiye FSBsi ukrainalı jurnalist Taras İbragimovğa çıqarğan Rusiyege ve işğali altındaki Qırımğa kiriş yasağını takbih etti. Bu aqta müessiseniñ Facebook saifesinde haber etile.
Ukraina prezidentiniñ temsilciligi, Taras İbragimov «qırımtatar faalleriniñ mahkemelerini, işğal etilgen Qırımda Rusiye quvetçileri keçirgen tintüv ve apiske aluvlarnı muntazam sürette aydınlattı», dep hatırlattı.
«Rusiye kontrolindeki sahte Qırım akimiyeti em tecribeli, em vatandaş jurnalistlerine basqı yapmağa devam ete: yarımadağa kirişlerini yasaqlay, memuriy protokollar tize, tuta, apiske ala. Böylece, yarımada daa çoq «qapalı alannı» añdıra, andan kerçek malümat almağa çare yoq».
Ukraina prezidentiniñ Qırım Muhtar Cumhuriyetindeki daimiy temsilciligi, Qırım ve Aqyar «Ukrainanıñ ayırılmaz parçaları ola, şunıñ içün işğalci akimiyet tarafından vaqtınca işğal etilgen yarımadağa kirişniñ er angi sıñırlanması İnsan aqları ve esas serbestlikleri – «Areket serbestligi» – şartnamesiniñ №4 protokolındaki 2-nci maddeni bozmaqta», dep qayd etti.
Ukraina milliy jurnalistler birligi, ukrainalı jurnalist Taras İbragimovnıñ Rusiyege ve işğali altındaki Qırımğa kiriş yasağını «repressiv arsenalnıñ bir parçası» olaraq adlandırdı.
2020 senesi yanvar ayında Rusiye FSBsiniñ hadimleri Qırım.Aqiqat muarririyetinen işbirligi yapqan ukrainalı jurnalist Taras İbragimovnıñ Rusiyege ve onıñ işğali altındaki Qırımğa kirişini 2054 senesi mayısnıñ soñuna qadar yasaqladı. Jurnalistniñ aytqanına köre, yasaqnıñ sebepleri ne qararda, ne de ağzaviy şekilde oña bildirilmedi.
2019 senesi fevralniñ 18-nde Qırım.Aqiqatnen işbirligi yapqan fotoressam Alina Smutkonıñ Rusiye işğal etken Qırımğa kirişi 2028 senesine qadar yasaqlandı. Smutko, yasaqnıñ sebebi onıñ zenaat işi oldı, dep bildirdi. Alina Smutkonıñ fotoresimi Radio Free Europe/Radio Liberty Culture & Traditions umumşirket fotoresimler yarışınıñ üç ğalebe işinden biri oldı.
2018 senesi noyabr ayında Rusiye FSBsi Qırım.Aqiqatnen çalışqan ukrainalı jurnalist Alena Savçuknıñ Qırımğa ve qomşu Rusiyege kirişini 2028 senesine qadaryasaqladı. Onıñ aytqanına köre, kirişi Rusiyege kiriş ve çıqış tertibine dair Federal qanunnıñ 27-nci maddesiniñ 1-inci qısmına köre («Devletniñ mudafaası ya da telükesizligi, ya da cemaat nizamı, ya da eali sağlığını qorumaq maqsadınen») yasaq etildi.
