Link açıqlığı

Saatnıñ esas haberi

Ukraina PACEde qırımtatarlarnıñ Rusiye quvetçileri tarafından tutuluvı ve apiske alınuvına cevap bermege talap etti


PACE, nümüneviy fotoresim
PACE, nümüneviy fotoresim

PACE Ukraina eyyetiniñ yolbaşçısı Mariya Mezentseva sentâbrniñ 27-nde Strasbourgda çıqışta bulunıp, işğal altındaki Qırımda Rusiye quvetçileri qırımtatarlarnı tutıp apiske aldı dep hatırlattı ve teşkilâttan buña cevap bermesini talap etti.

O, PACE bürosı «Ukraina eyyetiniñ Qırımda qırımtatarlarnıñ siyasiy taqip etilüvi aqqında munaqaşa keçirüv muracaatını red etti», dep tasdıqladı.

«PACE yüksek reberliginden zenaatdaşlarımıznıñ haber etkenine köre, bu qarar PACEniñ iyün ayında «Qırımda qırımtatarlarnıñ taqip etilüvinen bağlı» vesiqağa qoltutqanınen bağlı ve PACE bu qararğa riayet etilüvni taqip etmek içün monitoring vastasınen elinden kelgenini yapa», – dep añlattı Mezentseva.

«Çıqışımda büro qararına razı olmağanımnı bildirip, PACE Monitoring Komiteti ve Ayırım meseleleri komiteti yaqında olğan qırımtatarlarnıñ tutuluvına cevap bermeli ve reglamentke köre areket etmeli, dep qayd ettim. Rusiye mecburiyetlerini yapuv monitoringi altında ve bu olarğa fayda ketirmeycek, eyyetimiz bu aqta susmaycaq! İleride Rusiye eyyetiniñ vekâletlerini temyiz etmek içün daa bir delil olacaq!», – dep qoştı Mezentseva.

Avropa Şurası Parlament Assambleyasınıñ (PACE) «Qırımda tamır halqlarnıñ Rusiye Federatsiyası tarafından siyasiy taqip etilüvi» mevzusında munaqaşa keçirmeycegi aqqında PACEdeki Ukraina Yuqarı Radasınıñ daimiy eyyet azası Lesâ Vasilenko bildirgen edi.

Hatırlatamız, Avropa Şurası Parlament assambleyası iyünniñ 23-nde Rusiye işğal etken Qırımda qırımtatarlarnıñ aqları aqqında qararnı qabul etti.

Qırımtatar Milliy Meclisiniñ reisi Refat Çubarov PACEniñ Rusiye işğal etken Qırımda qırımtatarlarnıñ aqları aqqında qararınıñ qabul etilüvini «doğru» dep adlandırdı.

Rusiye Devlet Dumasınıñ halqara işler komitetiniñ reisi Leonid SlutskiyRusiye PACEniñ işğal altındaki Qırımda qırımtatarlarnıñ aqları bozuluvına dair qararnı yerine ketirmeycek, dep bildirdi.

Rusiye Devlet Dumasınıñ spikeri Vâçeslav Volodin PACEde qırımtatarlarnıñ aqları bozulğanına dair taqdim etilgen maruzanıñ müellifi, İslandiya vekili Sunna Evarsdottirniñ memleketke kirişini yasaqlamaq içün teşebbüsçi ola bile, dep bildirdi.

Ukraina eyyeti Qırımda insan aqlarınıñ vaziyeti, insanlarnıñ ğayıp oluvı ve yarımadada qanunsız apiske aluvlar, qırımtatarlarnıñ aqlarını qoruv, Rusiyeniñ Qırımtatar Milliy Meclisini «terror teşkilâtı» olaraq tanıma qararınıñ lâğu etilüvinen bağlı meselelerni Avropa Şurası insan aqları komissarı Dunja Mijatović ile muzakere etken edi.

Bloklav ve tsenzurasız haberler! Qırım.Aqiqat qullanımını qurmaq içün iOS ve Android.

Anğara köyündeki «gaz borusında diversiya» davası

Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Olar arasında qırımtatar siyasetçisi ve faali Nariman Celâl bar. Eki doğmuş qardaşlar Aziz ve Asan Ahtemovlar eki ayğa apiske alındı, Azizniñ babası Eskender Ahtemov 10 künge apiske alındı. Asan Ahtemovnıñ qardaşı Arsen 15 künge apiske alındı. Kreml kontrolindeki Kiyev rayon mahkemesi qırımtatar siyasetçisi ve faali Nariman Celâlnı eki ayğa – noyabrniñ 4-ne qadar apiske aldı. Nariman Celâl bütün qabaatlavlarnı inkâr ete.

Sentâbrniñ 7-nde TASS Rusiye malümat agentilgi Rusiye FSB-sine atfı etip, Aqmescit civarındaki Anğara (Perevalnoye) köyü yaqınlarında gaz borusında diversiya yapqanından şübheli sayılğanlar qabaatını itiraf etkenler, dep bildirdi. FSB yayınlağan videoda eki ekrek kimden talimat alğanlarını ve Anğara köyünde gaz borusınıñ patlatılmasını nasıl teşkil etkenlerini tafsilâtlı aytıp berdi.

FSB, diversiyanı Ukraina Mudafaa nazirliginiñ Baş istihbarat idaresi teşkil etti, dep israr ete.

Ukraina Mudafaa nazirliginiñ baş istihbarat idaresi Rusiye FSBsiniñ qabaatlavını «bir maqsadı olğan provokatsiya» olaraq köre.

Ukraina akimiyeti qırımtatar faalleriniñ tutuluvı ve apiske alınuvını avgustnıñ 23-nde Kyivde keçirilgen «Qırım platformasınıñ» sammitinen bağlay.

Ukraina ombudsmanı Lüdmila Denisova Qırımda insanlarnıñ apiske alınması sebebinden BM İnsan aqları Yuqarı komissarı Michelle Bacheletke muracaat etti.

Sentâbrniñ 3-4-nde Qırımdaki faallerniñ evlerinde keçirilgen tintüvler ve tutuvlardan soñ Qırım Muhtar Cumhuriyeti ve Aqyar prokuraturası cinaiy tahqiqat başlattı.

XS
SM
MD
LG