Ukraina Nazirler şurası keçirgen toplaşuvında ATR telekanalı içün bücet sermiyasını berüv imkânlarını yañıdan baqtı. Bu aqta Ukraina ükümetiniñ haberinde aytıla.
«Vesiqağa köre, para uydu bağı hızmetleri, televizion donatmalarınıñ kirası, bina kirası, müellif aqqı obyektleriniñ qullanıluvı ve satın alınuvı hızmetlerine sarf etilecek», – dep aytıla haberde.
Medeniyet ve informatsion siyaseti naziriniñ vazifelerini eda etken Svitlana Fomenkonıñ qayd etkenine köre, alınğan qarar ileride ATR telekanalına para bermek içün uquqiy zeminler doğuracaq.
Ükümet, bu masraflar 2020 senesiniñ Devlet büceti qanunına köre İçtimaiy siyaset nazirliginden Medeniyet ve informatsion siyaseti nazirligine berildi, dep hatırlattı.
Qırımtatar Milliy Meclisiniñ reis muavini, Ukraina Yuqarı Radasınıñ halq deputatı Ahtem Çiygoznıñ bildirgenine köre, Ukraina baş nazir muavini Oleksiy Reznıkov ATR qırımtatar telekanalına eñ yaqın vaqıtta para berilecek, dep işandırdı.
ATR alıp barıcısı ve jurnalisti Ayder Mujdabayevniñ bildirgenine köre, ATR qırımtatar telekanalı Qırımtatar sürgünligi qurbanlarını añma kününden evel işini toqtata bile.
Fevralniñ 10-nda ATR qırımtatar telekanalı esapları blok etildi, dep bildirdi. Şu sebepten telekanal alıp barıcı ve musafirler olmağan yayınlarnen #SaveATR marafonını başlattı.
O vaqıt Ukraina medeniyet, gençlik ve sport naziri olan Volodımır Borodânskıy ATR qırımtatar telekanalını qapatuv telükesi bar olğanını inkâr ete. Onıñ aytqanına köre, telekanal çalışa, şu sebepten «qapanmaq üzere olğanını aytmağa kerekmey». Borodânskıynıñ aytqanına köre, 2020 senesi ATR içün 50 mln ğrn belgilendi, nazirlik 8,4 mln ğrn tahsis etti.
ATR Ukrainadan sürgün etilgen qırımtatarlar ve diger millet insanlarını yerleştirüv bücet programmasına köre 2016 senesinden berli devlet bücetinden maddiy yardım ala.
2015 senesi aprelniñ 1-nde ATR Rusiye litsenziyasını alamayıp, işğal etilgen Qırımda yayınlarını toqtattı. Yayınlar 2015 senesi iyünniñ 17-nde yañıdan başladı – telekanal Kyivge köçti.
