Qırımtatar Milliy Meclisiniñ reis muavini, Ukraina Yuqarı Radasınıñ halq deputatı Ahtem Çiygoznıñ bildirgenine köre, Ukraina baş nazir muavini Oleksiy Reznıkov ATR qırımtatar telekanalına eñ yaqın vaqıtta para berilecek, dep işandırdı.
Çiygoznıñ Facebookta haber etkenine köre, o, bu meseleni Yuqarı Radanıñ insan aqları, işğalden qurtaruv ve vaqtınca işğal etilgen topraqlarnıñ reintegratsiyası, milliy azlıq ve milletlerara munasebetler komitetiniñ toplaşuvında mayısnıñ 6-nda köterdi.
«Komitetniñ işinde baş nazir muavini Reznıkov iştirak etti. Komitetimizniñ yardımınen oña muracaat etip, vaqtınca işğal etilgen Qırımdaki semetdeşlerimizniñ ATR telekanalına Nazirler şurası seviyesinde para berüv meselesiniñ blok etilgeninden qasevetlengenini bildirdim, bu meseleni şahsen al etmesini rica ettim», – dep yazdı Çiygoz.
Onıñ malümatına köre, Reznıkov «mesele blok etilmey, bir qaç tehnik mesele bar», dep işandırdı.
«Bu mesele bugün Nazirler Şurası toplaşuvında mıtlaqa muzakere etileceginden emin olğanını bildirdi», – dep qoştı Çiygoz.
ATR alıp barıcısı ve jurnalisti Ayder Mujdabayevniñ bildirgenine köre, ATR qırımtatar telekanalı Qırımtatar sürgünligi qurbanlarını añma kününden evel işini toqtata bile.
Fevralniñ 10-nda ATR qırımtatar telekanalı esapları blok etildi, dep bildirdi. Şu sebepten telekanal alıp barıcı ve musafirler olmağan yayınlarnen #SaveATR marafonını başlattı.
O vaqıt Ukraina medeniyet, gençlik ve sport naziri olan Volodımır Borodânskıy ATR qırımtatar telekanalını qapatuv telükesi bar olğanını inkâr ete. Onıñ aytqanına köre, telekanal çalışa, şu sebepten «qapanmaq üzere olğanını aytmağa kerekmey». Borodânskıynıñ aytqanına köre, 2020 senesi ATR içün 50 mln ğrn belgilendi, nazirlik 8,4 mln ğrn tahsis etti.
ATR Ukrainadan sürgün etilgen qırımtatarlar ve diger millet insanlarını yerleştirüv bücet programmasına köre 2016 senesinden berli devlet bücetinden maddiy yardım ala.
2015 senesi aprelniñ 1-nde ATR Rusiye litsenziyasını alamayıp, işğal etilgen Qırımda yayınlarını toqtattı. Yayınlar 2015 senesi iyünniñ 17-nde yañıdan başladı – telekanal Kyivge köçti.
