Rusiye Ukraina sıñırları yanında ordu sayısını çoqlaştıra ve ilhaq etilgen Qırımda raketalarını yerleştire, bu ise Şarqiy Avropa devletleri içün havflı ola bile.
Ukraina Mudafaa Nazirligi bildirgeni kibi, böyle fikirni nazir muavini Anatoliy Petrenko, Almaniya ziyareti vaqtında Şarqiy Avropa, Kavkaz ve Merkeziy Asiya meseleleri içün mesüliyetli olğan Michael Zilbert ile körüşüvde ifade etti.
Hususan, Petrenko, alman tarafını Ukraina etrafındaki siyasiy havfsızlıq, mudafaa islâatınıñ alı, Almaniya, Avropa Birligi ve NATO ile işbirlikniñ esas neticelerinden haberdar etti.
Bundan ğayrı, Petrenko, Keriç boğazındaki Rusiye tarafından tecavuz areketler ve Ukrainada ilân etilgen cenk vaziyeti aqqında aytıp berdi.
2018 senesi yanvar ayında Fiolent burnunda S-400 Rusiye uçaqquvar-raketa kompleksleri arbiy nevbetçilikke başladı. Sentâbr ayında bunıñ kibi kompleksler Kezlevde de yerleştirildi. 2018 senesi noyabrniñ soñunda Canköyde S-400 uçaqquvar-raketa kompleksiniñ dörtünci divizionı arbiy nevbetçilikke başladı.
BM Baş Assambleyası qabul etken Qırımnıñ askeriyleştirilüvi rezolütsiyasını izaatlağan qırımtatar halqınıñ lideri, Ukraina halq deputatı Mustafa Cemilev Qırım.Aqiqatqa dedi ki, vesiqa metnine köre, dünya toplulığı Qırımnıñ askeriyleştirilüvini tek Ukraina içün degil, bütün Qara deñiz regionınıñ memleketleri içün telüke olaraq köre.
Rusiye prezidenti Vladimir Putin dekabrniñ 20-nde Moskvada keçirgen matbuat konferentsiyasında Qırımdaki arbiy tehnikanıñ sayısı telükesizlikni temin etmek içün arttırılacaq, dedi.
