Rusiye prezidenti Vladimir Putin dekabrniñ 20-nde Moskvada keçirgen matbuat konferentsiyasında Qırımdaki arbiy tehnikanıñ sayısı telükesizlikni temin etmek içün arttırılacaq, dedi.
«Baş ştab, sıñırcılar bu yönelişte (arbiy tehnika sayısınıñ arttırılmasında – QA) bir şey yapılmaq kerek, dep tüşünse, bizler bunı yapacaqmız. Qırım Rusiyeniñ bir qısmı oldı, ve bizler telükesizlikni temin etmek içün er şey yapa bilemiz», – dep qayd etti Rusiye prezidenti.
Daa evel Qırımnıñ şimalinde Rusiye arbiy tehnikası areket ete, dep bildirilgen edi. Qırım.Aqiqat mühbiri eki arbiy tehnika kolonnasını kördi.
Dekabrniñ 18-nde BM Baş Assambleyası Qırım, Qara ve Azaq deñizleriniñ askeriyleştirilüvinen bağlı qararnı qabul etti. Oña 66 memleket qoltuttı, 19 qarşı çıqtı, 72 devlet bitaraf oldı.
Ukraina prezidenti Petro Poroşenko BM Baş Assambleyasınıñ Qırım, Qara ve Azaq deñizleriniñ askeriyleştirilüvinen bağlı qararını alğışladı.
BM Baş Assambleyası qabul etken Qırımnıñ askeriyleştirilüvi rezolütsiyasını izaatlağan qırımtatar halqınıñ lideri, Ukraina halq deputatı Mustafa Cemilev Qırım.Aqiqatqa dedi ki, vesiqa metnine köre, dünya toplulığı Qırımnıñ askeriyleştirilüvini tek Ukraina içün degil, bütün Qara deñiz regionınıñ memleketleri içün telüke olaraq köre.
2018 senesi yanvar ayında Fiolent burnunda S-400 Rusiye uçaqquvar-raketa kompleksleri arbiy nevbetçilikke başladı. Sentâbr ayında bunıñ kibi kompleksler Kezlevde de yerleştirildi. 2018 senesi noyabrniñ soñunda Canköyde S-400 uçaqquvar-raketa kompleksiniñ dörtünci divizionı arbiy nevbetçilikke başladı.
