Ukraina Milliy telükesizlik ve mudafaa şurasınıñ kâtibi Oleksiy Danılovnıñ bildirgenine köre, yanvarniñ 8-nde tüşürilgen «Ukraina halqara ava yolları» şirketi uçağınıñ «qara qutularını» qaytaruv meselesi İran akimiyetinen «zor ve kergin» muzakereler çerçivesinde laf etile. Bu aqta Azatlıq Radiosı haber ete.
«Memleketimizniñ ve çetel kütleviy haber vastalarına muracaat etip, 2020 senesi yanvarniñ 8-nde İranda tüşürilgen «Ukraina halqara ava yolları» şirketi Boeing-737-800 uçağınıñ «qara qutularını» Ukrainağa qaytaruv meselesini aydınlatuvda mesüliyetli olmalarına çağıram. İnformatsion ajiotaj, bu mesele etrafında oyunlar, teşkerilmegen malümatnıñ tarqatılması muzakere esnasını zorlaştıra ve onıñ neticelerine menfiy tesir ete bile», – dep bildire Danılovnıñ aytqanlarını MTMŞ matbuat hızmeti yanvarniñ 19-nda.
İran, qara qutularnı Kyivge bermege şimdilik planlaştırmay. IRNA İran devlet haber agentliginiñ bildirgenine köre, bu aqta İran vatandaş aviatsiyası teşkilâtınıñ qaza tahqiqatları bölüginiñ yolbaşçısı Hasan Rezayfer yanvarniñ 19-nda bildirdi.
İran akimiyeti, yanvarniñ 8-nde Tehran yaqınlarında tüşürilgen «Ukraina halqara ava yolları» uçağınıñ qara qutularını Ukrainağa bermege azırlana, dep bildirgen edi.
Yanvarniñ 19-nda «Borıspil» halqara ava limanında İranda tüşken Ukraina halqara ava yolları uçağınıñ qazası neticesinde elâk olğanlarnen vedalaşuv merasimi olıp keçti. Qaza neticesinde elâk olğan 11 ukrainalınıñ cesedleri Ukrainağa saba alıp ketirildi.
Ukraina Tış işler nazirligi, İranda Ukraina uçağınıñ tüşürilüvi neticesinde elâk olğan ukrainalılar cesetleriniñ identifikatsiyası yekünlendi, dep bildirgen edi.
«Ukraina halqara ava yolları» ava şirketiniñ PS752 seferli Boeing 737-800NG uçağı yanvarniñ 8-nde saba Tehrandan Kyivge yol alıp, İran paytahtınıñ halqara ava limanından çıqıp tüşti. 176 insan elâk oldı, 167-si yolcu ve 9 ekipaj azası edi. Elâk olğanlar arasında – 11 Ukraina vatandaşı (ekipaj azaları ve 2 yolcu).
