Ukraina Milliy politsiyasınıñ reisi İğor Klımenko, Donbastaki cenk iştirakçisi, faal ve cemaat erbabı Amina Okuyevanıñ öldürilüv davasınen bağlı bazı tafsilâtlar aqqında tarif etti. Onıñ aytqanına köre, laf diger cinayetlerden şübheli sayılğan bir gruppa insanlar aqqında kete.
«Gruppa erkânına yedi insan kirgen edi, bir qısmı 2019 senesi sentâbr ayında eki öldürüvden şübheli sayılıp yaqalandı. Bugün ise Amina Okuyevanıñ öldürilüvini ve aqayı Adamğa suiqastnı teşkil etken kişi yaqalandı. Er adam da cinayet gruppasınıñ azası ola», – dep bildire Klımenkonıñ aytqanlarını müessiseniñ matbuat hızmeti.
Ukraina İç işler naziri Arsen Avakovnıñ bildirgenine köre, bir qaç öldürüvden şübheli sayılğan «nişancılar gruppası» yaqalandı. Yaqalanğanlar Donbastaki cenk iştirakçisi, qadın faal ve cemaat erbabı Amina Okuyevanı öldürgeninden de şübheli sayıla. Okuyeva 2017 senesi oktâbrniñ 30-nda Kyiv vilâyetinde aqayı Adam Osmayevnen beraber ketken maşinağa açılğan ateş vaqtında elâk oldı.
Adam Osmayev, Ukraina İç işler naziriniñ haberini Facebook saifesinde izaatladı.
«Aminanı öldürgenlerni tapmaq içün çalışqanlarğa teşekkür bildirem ve bütün qabaatlılar tapılıp cezalanacaq, dep ümüt etem. Amina, Ukrainanı qoruğanda özüni acımadı, cebede eñ telükeli yerlerge bardı, qatilleri cezalanmalı», – dep yazdı Osmayev.
Amina Okuyeva Kyivde Euromaydanda iştirak etti. Ekim olaraq yaralanğanlarğa yardım etken edi. Daa soñra aqayınen beraber Donbasta cenkleşti. 2015 senesi fevral ayında, İsa Munayev elâk olğan soñ, Osmayev Cohar Dudayev batalyonınıñ yañı komandanı oldı. Amina Okuyeva batalyonnıñ matbuat kâtibi edi.
