Link açıqlığı

Saatnıñ esas haberi

Ukraina İç işler nazirligi: Amina Okuyevanı öldürgeninden şübheliler yaqalandı


Amina Okuyeva, 2016 senesi yanvarniñ 21-i
Amina Okuyeva, 2016 senesi yanvarniñ 21-i

Ukraina İç işler naziri Arsen Avakov bir qaç öldürüvden şübheli sayılğan «nişancılar gruppası» yaqalandı, dep bildirdi. Yaqalanğanlar Donbastaki cenk iştirakçisi, qadın faal ve cemaat erbabı Amina Okuyevanı öldürgeninden de şübheli sayıla. Okuyeva 2017 senesi oktâbrniñ 30-nda Kyiv vilâyetinde aqayı Adam Osmayevnen beraber ketken maşinağa açılğan ateş vaqtında elâk oldı. Osmayev Rusiyede prezident Vladimir Putinge suiqast etkeninde qabaatlana. O, ücüm vaqtında yaralandı, Okuyeva can berdi.

Avakovnıñ yazğanına köre, 2017 senesi cinayet yerinde silâ qaldırılğan edi. Üstünde qalğan DNA izleri ücüm etkenlerniñ şahsiyetlerini bilmege yardım etken eken. Yaqalanğan insanlarnıñ sayısı aydınlatılmadı. Avakov, bir adamnı yaqalav videosını Facebook saifesinde derc etti. Adı şimdilik belli degil.

Adam Osmayev, Ukraina İç işler naziriniñ haberini Facebook saifesinde izaatladı.

«Aminanı öldürgenlerni tapmaq içün çalışqanlarğa teşekkür bildirem ve bütün qabaatlılar tapılıp cezalanacaq, dep ümüt etem. Amina, Ukrainanı qoruğanda özüni acımadı, cebede eñ telükeli yerlerge bardı, qatilleri cezalanmalı», – dep yazdı Osmayev.

Amina Okuyeva Kyivde Euromaydanda iştirak etti. Ekim olaraq yaralanğanlarğa yardım etken edi. Daa soñra aqayınen beraber Donbasta cenkleşti. 2015 senesi fevral ayında, İsa Munayev elâk olğan soñ, Osmayev Cohar Dudayev batalyonınıñ yañı komandanı oldı. Amina Okuyeva batalyonnıñ matbuat kâtibi edi.

XS
SM
MD
LG