Ristov-na-Donu Rusiye şeerinde Ukraina baş konsulı Taras Malışevskiy, SİZOda terrorcılıq propagandasında qabaatlanğan qırımtatar blogeri Nariman Memedeminovnı ziyaret etti.
Bu aqta Malışevskiy Qırım.Aqiqat mühbirine aytıp berdi.
"Eki saat laf ettik, onı meraqlandırğan çoq mevzularnı muzakere ettik. Nariman, Ukraina Yuqarı Radası saylavlarınıñ neticeleri ve yañı parlamentke keçken qırımtatarlar aqqında tafsilâtlı bilmege istedi", - dep aytıp berdi Malışevskiy.
Onıñ aytqanına köre, Memedeminov, onıñ davasını yayınlağan ukrain matbuatqa ve jurnalistlerge minnetdarlığını bildirdi.
"İyül 24-ünde olıp keçken vaqıanı laf ettik, o vaqıt mahkeme, oturışta cemaat jurnalistlerniñ birine davanıñ foto ve video çeküvini yapmağa razı olmadı. Umumen, keyfleri müsbet ve apiste oluvını muvaqqat bir şey kibi köre. Olğanı kibi, daa bir apislinen mahsus blokta tutula, şaraitke şikâyet etmey. Mahsus blokta olğan haber izolâtsiyası şaraitinde onıñ adına gazeta abunesini yapmağa rica etti", - dep qoştı konsul.
Rostov-na-Donuda Şimaliy Kavkaz bölgesiniñ arbiy mahkemesinde mayıs 29-da terrorcılıqta qabaatlanğan qırımtatar cemaat jurnalisti, bloger Nariman Memedeminov davası boyunca birinci mahkeme diñlevi tayinlendi.
2018 senesi martnıñ 22-nde Bağçasaray rayonında Rusiye telükesizlik hadimleri ve uquq qoruyıcıları Nariman Memedeminovnıñ evini tinttiler. Ondan soñ faaliyetçi Aqmescitteki Rusiye FSBsi idaresine alıp ketildi. Martnıñ 23-nde mahkeme Memedeminovnı tevqif etti.
Memedeminovnı Rusiye CK-nıñ 205 maddesiniñ 2-nci qısmına ait olğan cinayette (İnternet vastasınen terrosistik areketlerge açıq çağıruvlar) qabaatlaylar.
Martnıñ 23-nde QMC prokuraturası, Ukraina Cinaiy kodeksiniñ 146-ncı maddesiniñ 2-nci qısmı (insannı qanunsız olaraq azatlıqtan marum etüv ya da alıp qaçuv) ve 162-nci maddesiniñ 2-nci qısmında (mesken toqunılmazlığınıñ bozuluvı) qayd etilgen cinaiy qanun bozuluvlarınıñ alâmetleri boyunca malümatnı Mahkemeden eveldki tahqiqatlarnıñ umumiy cedveline kirsetti.
Ukraina Milliy jurnalistler birligi (UMJB) Qırımda Memedeminovnıñ tevqif etilmesine «fikir serbestligi ve, cümleden İnternet ağı vastasınen, informatsiyanı serbest almaq ve darqatmaq aqqınıñ bozuluvı» dedi.
