Rusiyeniñ Novosibirsk şeerindeki Ukraina konsulı Sergey Kononenko Rusiye akimiyetinden işğal etilgen Qırımda devlet hainliignen qabaatlanıp apis cezasına mahküm etilgen Yatskin ile körüşmesine izin bermesini talap ete. Bunı Qırım.Aqiqatqa advokat Nikolay Polozov haber etti.
"O (Yatskin - QA), artıq Kemerov vilâyetiniñ cezahanesindedir. Yazıq ki, FSİN tarafından tuvğanlarına resmiy bildirüv kelmedi. Men fevral ayında onı yoqlaycaq olam. Novosibirskte Ukraina konsulı Rusiye TİN yazıp, Yatskin ile körüşmesine izin berilmesini istegenini bilem", - dedi Polozov.
Mayısnıñ 21-nde Rusiye nezaretinde olğan Qırımnıñ Yuqarı mahkemesi «devlet hainliginen» qabaatlanğan Qırım sakini İvan Yatskinge üküm çıqardı. Alla Hineviçniñ reisliginde qadılar kollegiyası İvan Yatskinni bir yıl sıñırlav ile 11 yıl sert apis cezasına mahküm etti.
Ukraina TİN dünya toplulığını İvan Yatskinge çıqarılğan ükümge cevap bermesine çağırdılar.
Ukraina Yuqarı Radasınıñ insan aqları vekâletlisi Lüdmila Denisova «devlet hainliginen» qabaatlanğan İvan Yatskinniñ ukmüni takbih etti.
Yatskin «devlet hainliginen» qabaatlandı (Rusiye ceza qanunnamesiniñ 275 maddesi – QA). Bu dava boyunca bütün mahkeme oturışları qapalı keçirildi, mahkeme, dava materiallarında devlet sırı olğanına atfı ete edi.
Qırımnıñ Curçı rayonınıñ Aybar (Voykovo) köyüniñ sakini İvan Yatskin 2019 yılda oktâbr 16-sında tutuldı. Bu dekabr ayında belli oldı.
Rusiye tahqiqatı, Yatskin Qırımda olıp, UMT ile işbirlik yaptı ve «Rusiyeniñ devlet sırı» olğan malümatnı olarğa bildirdi, dep ayta.
Qırım.Aqiqatnıñ Ukraina telükesizlik hızmetine yollağan muracaat cevabında İvan Yatskin UTH ile işbirligi yapmadı, dep aytıla.
«Memorial» aq qorçalayıcı merkezi İvan Yatskinni siyasiy mabüs dep tanıdı.
