Ukrainanıñ Rostov-na-Donu konsulı vazifelerini eda etken Taras Malışevskiy Rostov-na-Donu SİZOsında «Hizb ut-Tahrir davasınıñ» (Aqmescitteki birinci gruppa) mahküm etilgen üç mabüsi Emil Cemadenov, Ayder Saledinov ve Rustem İsmailovnı ziyaret etti. Bu aqta «Qırım birdemligi» cemaat birleşmesi haber ete.
«Bu izolâtorda artqaç sertlik yoq. Er birinen ayrıca körüştim. 30-40 daqqa laf ettik. Kameralarnıñ yanında bir oda, nezaretçi – de biznen edi, de çıqa edi. Başta oquğanlarımnı tarif ettim: olarnıñ muracaatlarından ve Moskva Yuqarı mahkemesinde aytqan «soñki sözlerinden» alğan teessuratlarım, insanlarnıñ cevabı, mahkeme ögüne bütün Qırımda keçirilgen dualar aqqında. Ömür arqadaşlarınıñ mektüplerini oqudım», – dep tarif etti Malışevskiy.
Diplomatnıñ malümatına köre, Ayder Saledinovnıñ şikâyeti olmadı, bu şaraitlerde özüni mümkün olğanı qadar yahşı is etkenini ayttı. Rustem İsmailov balalarına muracaat etip, «analarınıñ sözüni diñlemege ve oña yardım etmege» rica etti. Emil Cemadenov er keske sıcaq selâmlar aytıp, «em mahkemede, em Qırımda olğan destekten, halqınıñ birliginden can-yürekten ayrette qalğanını» bildirdi.
Berilgen malümatqa köre, Malışevskiy yaqın künlerde ağa-qardaş Abdullayevlerni Taganrog SİZO-2 ziyaret etmek içün izin almağa tırışa.
Rusiye Yuqarı mahkemesi dekabrniñ 24-nde istinaf şikâyetini baqıp, «Hizb ut-Tahrir davası» mabüsleriniñ (Aqmescitteki birinci gruppa) ükmüni deñiştirdi. Qırımlılarnıñ apis cezaları 6 ayğa eksildi.
Böylece, Uzeir Abdullayev 12 yıl ve 6 ay, Rustem İsmailov 13 yıl ve 6 ay, Emil Cemadenov 11 yıl ve 6 ay, Ayder Saledinov 11 yıl ve 6 ay apis cezasını aldı. Teymur Abdullayevniñ ükmü ğayrıdan baqılğan soñ, onı 16 yıl ve 6 ayğa üküm ettiler, onıñ içün 1 yıl ve 4 ay müddetinen memuriy nezaret belgilendi.
2019 senesi iyün ayında Rostov-na-Donunıñ Cenübiy okrugınıñ arbiy mahkemesi bu dava mabüsleri Teymur Abdullayevni 17 yılğa, Uzeir Abdullayevni 13 yılğa, Rustem İsmailovnı 14 yılğa, Ayder Saledinov ve Emil Cemadenovnı 12 yılğa üküm etti.
Ukraina Tış işler nazirligi bu davağa narazılıq bildirip, Rusiyege qarşı sanktsiyalarnı quvetleştirmege çağırğan edi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
