Rusiye ile muzakerelerde Ukraina eyyetiniñ azası, Ukraina Yuqarı radasındaki «Sluğa narodu» fraktsiyasınıñ yolbaşçısı David Arahamiya Rusiye tarafı ile «añlaşması imkânsız kibi olğan yekâne mesele» – «Qırımnı (Rusiyege ait olğanını) tanıma ve «Donetsk ve Lugansk «halq cumhuriyetleriniñ» mustaqilligini tanıma, dep bildirdi.
Rusiyeniñ diger talaplarını aytsaq – hususan Ukrainanıñ neytral arbiy statusı aqqında – Arahamiya, NATO memleketiniñ kirmesini 5-10 yıl muzakere etmege azır degil, Ukraina ise «kirmek içün küreşmeycek», dep bildirdi.
Arahamiya, Ukraina reberligi, prezident Volodımır Zelenskıynen beraber, memleketni terk etkenine ve Poloniyada bulunğanına dair öşeklerni de izaatladı. «Bir qaç kün evelsi ciddiy subetimiz oldı, ve biz soñki daqqağa qadar Ukrainada qalmağa qarar berdik, ve can bermege kerek olsa, biz timsal olurmız, ve qalğan ukrainalılar soñki qan tamçısına qadar küreşecekler», – dep bildirdi «Sluğa narodu» fraktsiyasınıñ yolbaşçısı.
Rusiye prezidenti Vladimir Putin bazar künü Frenkistan prezidenti Emmanuel Makron ve Türkiye prezidenti Recep Tayyip Erdoğan ile telefonda laf etti. Putin, arbiy operatsiyanıñ toqtatıluvı içün Kyiv Rusiyeniñ bütün talaplarını yerine ketirmeli ve Rusiye ordusına qarşı arbiy areketlerini toqtatmalı, dep bildirdi. Aks alda operatsiya soñuna qadar kerçekleştirilecek. Yelisey sarayınıñ haberine köre, Putin Makronğa qoyğan maqsadlarına irişecek, dep ayttı – küçnen ya da muzakereler vastasınen.
Ukrainağa qarşı Rusiye silâlı ücümi fevralniñ 24-nde Vladimir Putinniñ buyruğınen başlandı. O, Kremlniñ areketleri NATOnıñ Ukrainanı Rusiyege qarşı ileri mevzi yapmaq isteginen bağlı, dep ayttı. Ukraina ve NATO bunı inkâr eteler. Şimaliy atlantik arbiy alyansqa kirmekten vazgeçüv, Qırımnıñ Rusiye olaraq tanılması, «DNR» ve «LNR» mustaqilliginiñ tanılmasından ğayrı, Putin Ukrainadan «denatsifikatsiya» ve «askeriysizleştirüv» talap ete.
ABD ve Ğarp memleketleri Moskvağa qarşı sert sanktsiyalar kirsetti. Olar tek siyasetçi ve memurlarğa degil, adiy vatandaşlarğa da tesir ete. Yüzlernen şirket ve brend Rusiyedeki biznesni toqtattı.
Cenk başlağanından berli elâk olğan Rusiye ve Ukraina askerleriniñ sayısı ve elâk olğan barışıqsever sakinlerniñ sayısı şimdilik tam belli degil, lâkin biñlernen insan olğanı belli.
