Rusiye rejimi kontrol etken topraqlarında ve işğal etilgen Qırımda seferberlik keçire. «Qırım platformasınıñ» malümatına köre, Rusiye ordusında işğal etilgen yarımadada askerlikke alınğan bayağı qırımlı bar, şimdi olarnı Ukrainağa qarşı cenkke yollağanlar. Qırımda böyle arbiylerniñ soy-soplarınen körüşeler, tuvğanları Ukrainağa qarşı cenkleşkende psihologik yardım almağa çareleri bar, dep bildireler. Askerlerniñ bulunğan yeri ve alı aqqında soy-soplarına haber etilmey.
Aq qorçalayıcılar işğal altındaki Qırımda Ukrainağa qarşı cenk içün seferber etile bilecekler içün hatırlama yapa. Tevsiyeler arasında – celpname almamaq, yaşağan yerni vaqtınca deñiştirmek, askerlik yapmamaq içün sebeplerni mümkün olğanı qadar çoq qullanmaq ve digerleri.
«Qırım aq qorçalayıcı gruppasınıñ» yolbaşçısı Olga Skripnik al-azırda Rusiye bir «talim» keçirmey, dep qayd ete. Seferberlik Ukrainağa qarşı cenkni devam ettirmek içün keçirile. «Bu mecburiy seferberlik, Rusiyeniñ Qırımda yılda eki kere keçirgen askerlikke celp etüv çerçivesi tışında yapıla», – dep qayd ete aq qorçalayıcı.
Ayatını qurtarmaq ve Ukrainanıñ barışıqsever sakinlerine qarşı arbiy cinayetlerde iştirak etmemek içün yekâne fırsat teslim olmaqtır
Rusiyeniñ Ukrainağa qarşı cenki başlağan soñ Rusiye ordusına celp etilgenlerge aq qorçalayıcılar ilk fırsatta teslim olmağa tevsiye ete. «Ayatını qurtarmaq ve Ukrainanıñ barışıqsever sakinlerine qarşı arbiy cinayetlerde iştirak etmemek içün yekâne fırsat teslim olmaqtır», – dep ayta Olga Skripnik. Aq qorçalayıcı, Ukraina Silâlı quvetleri Rusiye ordusına oşamayıp, Halqara gumanitar uquq normalarına riayet ete, esirlerge işkence yapmay ve zarar ketirmey. Hasta ve yaralanğanlarğa tibbiy yardım kösterilecek.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: rukrymr.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
Sergey Mokruşin, Qırım.Aqiqat alıp barıcısı
