Ukraina Milliy devlet teleradiokompaniyası (UMDT) idare azası Aleksandra Koltsova, Ukraina “Eurovision-2019” yarışında iştirak etmekten vazgeçe bilecegini bildirdi.
Onıñ aytqanına köre, “Suspilne” şimdi Kazka taqımınen yarış iştiragini muzakere ete.
“Amma men bellesem, şimdiki vaziyet - bu krizis ve mında doğru qarar yoq, çünki cemiyet de bölündi”, - dedi Koltsova.
Tünevin, yarışta ekinci yerni qazanğan, Freedom-jazz taqımı“Eurovision”da iştirak etmekten vazgeçti.
Fevral 25-inde Ukraina Milliy devlet teleradiokompaniyası, «Eurovision-2019» ukrain milliy saylavınıñ finalında ğalebe qazanğan yırcı MARUV yır yarışına barmaycağını bildirdi.
«Eurovision-2019» ukrain milliy saylavınıñ finalında ğalebe qazanğan yırcı MARUV «yarıştaki iştirakini siyasetçilerimizniñ aktsiyalarına çevirmeyip», şiarlarnen çıqışta bulunmağa azır olmağanını bildirdi.
