«Eurovision-2019» ukrain milliy saylavınıñ finalında ğalebe qazanğan yırcı MARUV «yarıştaki iştirakini siyasetçilerimizniñ aktsiyalarına çevirmeyip», şiarlarnen çıqışta bulunmağa azır olmağanını bildirdi. Bu aqta o, Tel-Avivdeki yır yarışında iştirak etmekten vazgeçkenini izaatlap, Facebookta yazdı.
«Daa evel aytqanım kibi, Rusiyedeki kontsertlerden vazgeçüv bizim içün printsipial degil edi. Añlaşmanıñ diger noqtaları añlaşmamazlıqlarnıñ sebebi oldı, olarnı imzalasam, olar bir taraflı ola. Men – Ukraina vatandaşım, bergi töleyim ve Ukrainanı can-yürekten sevem… Men – yırcım, siyasiy alandaki alet degilim», – dep aytıla haberde.
Ukraina Milliy Devlet teleradiokompaniyasınıñ idare reisi Zurab Alasaniya bildirdi ki, yırcı MARUV «Eurovisionğa» barmaycaq, çünki taraflar añlaşıp olamadı.
Onıñ qayd etkenine köre, Ukrainanı Eurovisionda temsil etecek icracı aqqında qarar daa alınmadı. «Nevbetteki namzet ile muzakerelerge saba başlaycaqmız» dedi.
Alasaniyanıñ qayd etkenine köre, Ukraina Milliy devlet teleradiokompaniyası «yarışnı daa ziyade siyasetleştirmemek içün» añlaşmada şartlarnı yazıp qoydı: yır yarışında Ukrainanı temsil etecek icradı Rusiyedeki çıqışlardan vazgeçmeli (yarıştan soñ üç ay devamında), «Ukraina topraq bütünligi ya da Ukrainağa halqara seviyede zarar ketirebilecek açıq ifadelerge diqqatlı olması».
Fevralniñ 23-nde «Eurovision-2019» ukrain milliy saylavında yırcı Maruv ğalebe qazandı. O, 2019 senesi mayıs ayında Ukrainanı yır yarışında temsil etecek. Daa evel Maruv Rusiyede çıqışta bulunğanını aytqan edi.
Final neticelerine köre o, 12 baadan 11-ini qazandı. Jüri azaları yırcığa 5 baa qoydı, seyircilerniñ rey berüv neticelerine köre Maruv eñ yüksek 6 baanı aldı.
«Eurovision-2019» yır yarışında Ukrainanı temsil etecek kişinen bağlı qararnı Milliy cemaat teleradiokompaniyası milliy saylav neticeleri ilân etilgeninden 48 saat içinde tasdıqlamaq kerek edi.
