Brükselde Qırımnıñ ilhaqınıñ uquqiy aqibetlerine dair Ukraina-AB resmiy olmağan mesleatlaşmalar vaqtında Ukraina delegatsiyası Avroplı temsilcilernen Qırım platformasınıñ inkişafı içün kelecek adımlarnı ve telükesizlik, insan aqları ve AB Qırımğa dair sankitsâlar siyasetini muzakere etti, dep haber ete Ukraina TİN.
«Taraflar Qırımnıñ muvaqqat işğali ile bağlı meselelerniñ bütün spektrini, hususan Qırım ve Qara deñiz bölgesinde vaziyetniñ kerginleşmesini, Avropanıñ tanımama siyasetini ve AB-nıñ Qırımğa dair tanımama siyasetini, Qırım platforması faaliyetiniñ inkişafını ve Ukrainanıñ Qırım yarımadasını işğalden azat etmek ğayretlerini, işğalci RF memuriyeti tarafından halqara gumanitar uquqnıñ bozulması vaziyetini, yarımadada insan aqlarınıñ mudafaası meselelerini muzakere ettik», – dep yazıla bildirmede.
Ukraina delegatsiyası Qırım ealisiniñ etnik terkibiniñ mecburiy deñiştirilmesine, Rusiyeniñ silâlı quvetlerine qanunsız mecburiy celp etüvge, yarımada sakinleriniñ kerçek malümat menbalarına irişiminiñ olmamasına, tuvğan qırımtatar ve ukrain tillerinde tasil almaq aqqından marum etüvge, jurnalistler ve uquq qoruyıcılarnıñ taqip etilmesine, Qırımda tarihiy abidelerniñ ve medeniy miras obyektleriniñ yoq etilmesine diqqat çekti.
Mesleatlaşmalar vaqtında taraflar AB-niñ Qırım platformasınıñ faaliyetine kelecek celp etilmesi yollarnı ve aletlerni muzakere ettiler. Ukraina TİN yolbaşçısınıñ birinci muavini Emine Ceppar 2022 senesiniñ başında Qırım platforması çerçivesinde nazirler seviyesinde halqara tedbiri Qara deñiz telükesiziligi konferentsuiyasına azırlıq aqqında haber etti.
Avropa Birliginiñ delegatsiyası ise öz nevbetinde Qırımnıñ işğaline dair deñişmez tanımama noqta-i nazarını tasdıqladı.
Ukraina TİN ve "Qırım platformasınıñ" ekspert ağı tedbirler, konferentsiyalar, seminarlar ve tögerek masalar keçirmek, mustaqil taliliy merkezlerniñ araştırma leyhalarını desteklemek ve "Qırım platformasınıñ" ilerideki inkişafı içün işbirlik aqqında memorandum imzaladılar.
«Qırım platforması»
Qırımnı işğalden qurtaruv halqara meydançığı (Qırım platforması) – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.
2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.
Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.
Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.
2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.
Ukraina prezidenti Volodımır Zelenskıy bildirgenine köre, Avropa Birliginiñ liderleri Avropa Birliginiñ Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.
Kreml, Qırım meselesi qapatıldı ve Rusiye onı halqara muzakerelerge almaycaq, dep bir qaç kere bildirgen edi.
