Ukraina TİN ve "Qırım platformasınıñ" ekspert ağı tedbirler, konferentsiyalar, seminarlar ve tögerek masalar keçirmek, mustaqil taliliy merkezlerniñ araştırma leyhalarını desteklemek ve "Qırım platformasınıñ" ilerideki inkişafı içün işbirlik aqqında memorandum imzaladılar. Bunı TİN matbuat hızmeti haber etti.
"Vesiqada işbirlikniñ ğayeleri ve vazifeleri qayd etileler. Ukraina TİN “Qırım platforması” çerçivesinde Qırım mevzusına bağışçlanğan dünyadaki mustaqıl talil merkezleriniñ sınav leyhaylarına destek kösterecek, tedbirlernıñ, konferentsiyalarnıñ, tyogerek masalarnıñ teşkil etilüvinde ve ortaq keçirirüvinde yardım etecek", - dedi Kuleba.
Nazirniñ bildirgenine köre, Qırımnıñ işğalden zat etilüv meselesini yañı halqara seviyesine çıqarmağa on kelgen.
“Bu vazifeni yerine ketirmek içün kerçekten er kes çalışa: prezident, parlament, Ukraina ükümeti ve grajdan teşkilâtlar. “Qırım platformasınıñ” yaratuvı ile biz Qırımnıñ işğalden azat etilüv meselesini dünyanıñ kün tertibine qaytardıq", - dedi o.
Kulebanıñ bildirgenine köre, TİN ve Ekspert ağı arasında semereli işbirlikniñ tüzetilüvi pek müim adımdır.
“Ekspert ağınıñ işi meni quvandırta. O 70-ten ziyade ukrain ve tış grajdan teşkilâtlarını, talil merkezlerini, uquq qoruyıcılarını birliştirdi. Olar Qırımnıñ Rusiye tarafından işğal etilvini ve onıñ meselelerini er kün tedqiq eteler. Şimdiki vaqıtta ağnıñ baqıluvında 180 talap bar. Olarnı, “Qırım platformasınıñ” faaliyetine qoşulmağa istegen tış ekspertler ve teşkilâtlar yolladılar", - dep ayttı o.
«Qırım platforması»
Qırımnı işğalden qurtaruv halqara meydançığı (Qırım platforması) – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.
2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.
Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.
Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.
2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.
Ukraina prezidenti Volodımır Zelenskıy bildirgenine köre, Avropa Birliginiñ liderleri Avropa Birliginiñ Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.
Kreml, Qırım meselesi qapatıldı ve Rusiye onı halqara muzakerelerge almaycaq, dep bir qaç kere bildirgen edi.
