Rusiye tutqan ukrainalı deñizcilerni azat etüv esnası başlandı, dep bildirdi rusiyeli advokat Nikolay Polozov.
«Cenk esiri ukrainalı deñizcilerniñ imaye taqımı azat etilüvinen bağlı teşkerilmegen öşek ve tahminlerni izaatlamağan edi. Şimdi ise esnas başlandı, dep ayta bilemiz», – dep yazdı Polozov sentâbrniñ 7-nde Facebookta.
Daa evel haber etilgeni kibi, Ukraina Yuqarı Radasınıñ insan aqları vekâletlisiniñ ofisine cumaertesi künü, sentâbrniñ 7-nde, saba Rusiyede tutulğan Ukraina vatandaşlarınıñ tuvğanları kele. Mında yolcu avtobusları keldi, tuvğanlar anda mindirildi. Avtobuslar şimdilik belli olmağan tarafqa ketti.
Bundan evel avtobuslar «Lefortovo» SİZOsını terk etti. Advokatlar gruppasınıñ reberi Nikolay Polozov apiske alınğan ukrainalı deñizciler cumaertesi künü Moskvadaki «Lefortovo» SİZOsını terk etti, dep bildirdi Qırım.Aqiqatqa.
Avgustnıñ 30-nda gece Ukraina ve Rusiye arasında tutulğan şahıslarnıñ deñişüvi olacağına dair ilk haberler peyda oldı. Bu aqta keçken çağırılış halq deputatı Artur Palatnıynıñ yardımcısı Anna İslamova yazdı, onıñ malümatını Ukrainanıñ yañı baş prokurorı Ruslan Râboşapko paylaştı. Daa soñra bu yazı yoq oldı.
Ukraina telükesizlik hızmetiniñ spikeri Olena Ğitlânska avgustnıñ 30-nda saba bildirdi ki, «reinelerni deñişüv boyunca zor muzakereler esnası devam ete». O, jurnalistlerni «yañlış malümat tarqatmamalarına» çağırdı. Aynısını Ukraina prezidenti Volodımır Zelenskıynıñ ofisi de yazdı.
Daa soñra Ukraina telükesizlik hızmeti Ukraina ve Rusiye arasında tutulğan şahıslarnı deñişüv künü belgilengen soñ onı kütleviy haber vastalarına bildirmege vade etti.
Soñki aftaları kütleviy haber vastaları Rusiye ve Ukraina «33-ke 33» deñişüv (Rusiye Deñiz uquqı boyunca halqara mahkemeniñ qararı esasında azat etilecek Qara deñizde zapt etilgen ukrainalı deñizcilerni de bu formulağa kirsete) aqqında añlaştı, dep bildire. Avgustnıñ 23-nde Ukraina prezidenti Volodımır Zelenskıy Ukraina ve Rusiye arasında tutulğan şahıslarnı deñişüvniñ «birinci neticeleri» eñ yaqın vaqıtta olacağına ümüt etkenini bildirgen edi.
