Ukraina telükesizlik hızmeti Ukraina ve Rusiye arasında tutulğan şahıslarnı deñişüv künü belgilengen soñ onı kütleviy haber vastalarına bildirmege vade ete. Bu aqta UTH spikeoi Olena Ğitlânska Qırım.Aqiqatqa bildirdi.
«Kün belgilengen soñ onı birden cemaatqa bildirecekmiz. Biraz bekleñiz ve onı (deñişüvni – QA) yekünlemege beriñiz», – dedi Ğitlânska.
BBC Ukraina içün izaat bergen Ğitlânska deñişüv künü daa yoq, dep bildirdi.
Azatlıq Radiosınıñ Ukraina uquq qoruyıcı organlarındaki menbası kütleviy haber vastalarında çıqqan memurlarnıñ aytqanlarını izaatlap, Ukraina ve Rusiye arasında tutulğan şahıslarnıñ deñişüvi kelecek aftağa qaldırıla, dep bildirdi.
Deñişüv kelecek afta ola bilecegini bir qaç Rusiye vatandaşınıñ advokatı Valentin Rıbin bildirgen edi. Onıñ qayd etkenine köre, müvekkilleri alâ daa Ukrainadaki SİZOda buluna, deñişüv künü ise salı, sentâbrniñ 3-ü, ola bile, dedi.
Rusiyede tutulğan deñizcilerniñ tuvğanları olarnıñ Ukrainağa kelgenini Qırım.Aqiqatqa bildirdi.
Faqat bu malümat resmiy şekilde öyle de tasdıqlanmadı.
Ukraina telükesizlik hızmetiniñ spikeri Olena Ğitlânska avgustnıñ 30-nda saba bildirdi ki, «reinelerni deñişüv boyunca zor muzakereler esnası devam ete». O, jurnalistlerni «yañlış malümat tarqatmamalarına» çağırdı.
Ukraina prezidenti Volodımır Zelenskıynıñ ofisi avgustnıñ 30-nda saba bildirgenine köre, tutulğan şahıslarnı deñişüv esnası devam ete. Ukraina prezidentiniñ matbuat kâtibi Yuliya Mendel de tutulğan şahıslarnı deñişüv esnası devam ete, dep yazdı.
Ukraina Yuqarı Radasınıñ hadimi Anna İslamovanıñ Facebookta bildirgenine köre, «deñişüv yekünlendi» ve ukrainalılar evge kele. Onıñ yazğanlarını Yuqarı Rada tayin etken Ukraina baş prokurorı Ruslan Râboşapka paylaştı.
Daa soñra ukrainalılarnıñ uçağı «Kyiv» ava limanına qondı, dep haber etildi. Qırım.Aqiqat mühbirleriniñ bildirgenine köre, ava limanında jurnalistler toplaştı.
Ukraina Silâlı quvetleri komandanlığındaki menbalarnıñ Qırım.Aqiqatqa bildirgenine köre, Rusiye esir alğan ukrainalı deñizci ve siyasiy mabüsler ava limanında resmiy şekilde qarşılanmaycaq, olarnı birden hastahanege alıp ketecekler.
Kütleviy haber vastaları Rusiye ve Ukraina «33-ke 33» deñişüv aqqında añlaştılar, dep bildirgen ediler. Ukraina prezidenti Volodımır Zelenskıy Ukraina ve Rusiye arasında tutulğan şahıslarnı deñişüvniñ «birinci neticeleri» eñ yaqın vaqıtta olacağına ümüt etkenini bildirgen edi.
