Ukraina BM iştirakçi memleketlerini «Qırım platformasına» qoşulmalarına çağırdı. Bu aqta Ukrainanıñ BM daimiy vekili Serğiy Kıslıtsâ fevralniñ 23-nde BM Baş assambleyasınıñ Ukrainanıñ vaqtınca işğal etilgen topraqlarındaki vaziyetnen bağlı munaqaşalar vaqtında ayttı.
«Ğayretlerimizni halqara seviyede birleştirmek içün yañı formatnı teklif ettik – «Qırım platforması». Qırımnı azat etüv esnasınıñ strategik hayaliniñ ilerilemesine ve çeşit forumlarda belli esnaslarda sinergiya qoşulmasına yardım etüv ıntıluvıdır», – dep ayttı Serğiy Kıslıtsâ.
Onıñ bildirgenine köre, platforma beş prioritetli saağa celp ete: qabul etmeme siyaseti, telükesizlik, sanktsiyalarnıñ semereligi, insan aqlarını qoruv, vaqtınca Qırım işğaliniñ iqtisadiyatqa ve tabiatqa menfiy tesir etüvniñ yeñilmesi.
BM Baş assambleyasında fevralniñ 23-nde Ukrainanıñ vaqtınca işğal etilgen topraqlarındaki, hususan Rusiye işğal etken Qırım yarımadasındaki vaziyetnen bağlı munaqaşalar keçirildi.
Serğiy Kıslâtsâ, işğal altındaki Rusiye akimiyeti «ukrainler ve yarımadanıñ tamır ealisi olğan qırımtatarlarnıñ kimliklerini yoq etmege tırışa», dep bildirdi Birleşken Milletlerde.
Rusiyeniñ BM yanındaki daimiy vekiliniñ birinci muavini Dmitriy Polânskiy Ukrainanıñ vaqtınca işğal etilgen topraqlarındaki vaziyetke dair munaqaşalarnı «oñaytsız levha» dep adlandırıp, Ukraina Qırım yarımadasınıñ sakinlerini «qaytarmaz», dedi.
Hatırlatamız, Ukraina Tış işler naziri Dmıtro Kuleba ve Litvaniya zenaatdaşı Gabrielüs Landsbergis fevralniñ 23-nde Kyivdeki matbuat konferentsiyasında Vilnüs ve Kyiv «Qırım platformasını» ve Rusiyege qarşı sanktsiyalarnı uzatuv imkânını muzakere etkenler, dep bildirdi.
Ukraina prezidenti ofisiniñ reber muavini İğor Jovkva «Qırım platforması» boyunca halqara sammit Ukrainada 2021 senesi avgustnıñ 21-nde olacaq, dep bildirgen edi.
Ukraina Tış işler naziriniñ birinci muavini Emine Ceppar Qırım.Aqiqat Radiosınıñ yaynında, kelecek yılnıñ mayıs ayında keçirilmesi planlaştırılğan yarımadanı işğalden azat etüv «Qırım platforması»sammitiniñ neticelerine köre muvafıq beyanname qabul etilecek, dep bildirdi.
Rusiye Tış işler nazirliginiñ spikeri Mariya Zaharovanıñ aytqanına köre, Rusiye tarafı Ukraina teşebbüsinen keçirilecek Qırım platformasında iştirak etmege azır, amma meydançıqta yarımada problemleri muzakere etilmeli – suv teminlevinden naqliyatqa qadar.
Qırımnı işğalden qurtaruv halqara meydançığı (Qırım platforması) – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.
2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.
Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.
Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.
2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.
Ukraina prezidenti Volodımır Zelenskıy bildirgenine köre, Avropa Birliginiñ liderleri Avropa Birliginiñ Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.
Kreml, Qırım meselesi qapatıldı ve Rusiye onı halqara muzakerelerge almaycaq, dep bir qaç kere bildirgen edi.
