Link açıqlığı

Saatnıñ esas haberi

"Ukrain pasportını aldılar ve alıp kettiler": faal Kadırovnıñ qadını rusiye quvetçileriniñ kelmesi aqqında aytıp berdi


Avgust 31-inde saba FSB idaresine alınğan Seyitler rayonından faal Ayder Kadırovnıñ qadını, evde tintüv yapılmağanını haber etti, amma aqayınıñ ukrain paspirtını aldılar ve özüni Aqmescitke sorğuğa alıp kettiler.

Onıñ aytqanına köre, maskalı adamlar evlerine saat altıda saba kelip, qapını qaqıp başladılar. Quvetçiler ev içine kirgen soñ, protokolnı oqudılar ve hanelerni dolandılar.

"Aqayımdan nasıldır Dadaconov Umirconnı bilemi, dep soradırlar, oña protokol bar edi, onı 205.5 maddesi boyunca qabaatlaylar. Pasportını soradılar, aqayımnıñ Rusiye pasportı yoq edi, çünki biz vesiqalarnıtapşırdıq, Ukraina pasportı bar edi. Olar Ukraina pasportını ve telefonını aldılar. Onı sadece sorğulacaqlarını ve soñra yibereceklerini ayttılar", - dedi qadın.

Onıñ aytqanına köre, Ayder Kadırov 4 balanıñ babası ola, büyügi - balalıqtan saqat, aqaynıñ özünde diabet hastalığı bar.

Daa evel Seyitler rayonında "Qırım birdemligi"niñ jurnalisti, "Grani.ru" mühbiri Ayder Kadırovnıñ evi tintilgeni bildirile. Bundan ğayrı Seyitler Vaqıf (Razlivı) köyünde Seyitler soqağında tintüv yapılğanı haber etile edi. Onıñnen beraber İçki rayonında (İçki qasabası, Zolotovo soqağı) Enver Topçınıñ ve Sudaqta (Çalaş Smail soqağında) faal Ridvan Ümerovnıñ evi tintildi.

Rusiye quvetçileri bu vaziyetni açıq tefsir etmey.

XS
SM
MD
LG