Avgustnıñ 31-inde saba Seyitler (Nijnegorskoye), İcki (Sovetskoye) rayonlarında ve Sudaqta rusiye quvetçileri qırımtatarlarnıñ evlerinde tintüvlerni keçire. Bunı "Qırım birdemligi" birleşmesi bildire.
Seyitler rayonında "Qırım birdemligi"niñ jurnalisti, "Grani.ru" mühbiri Ayder Kadırovnıñ evi tintilgeni bildirile. Bundan ğayrı Seyitler Vaqıf (Razlivı) köyünde Seyitler soqağında tintüv yapılğanı haber etile.
Faallerniñ malümatına köre, tintüv vaqtında evde qadını ve dört balası bar. Kencesi 2,5 aylıq, onı evniñ yanında tışarıda turğan bitasına berdiler.
İçki rayonında (İçki qasabası, Zolotovo soqağı) Enver Topçınıñ evi tintile.
Bundan ğayrı Sudaqta (Çalaş Smail soqağında) faal Ridvan Ümerovnıñ evinde tintüv yapılğanı bildirile.
"Qırım birdemligi" Seyitler Vaqıf köyündeki tintüvden canlı yayın yaptı.
Rusiye quvetçileri bu vaziyetni açıq tefsir etmey.
2014 senesiniñ Rusiyeniñ Qırım işğalinden soñ mustaqil jurnalist, vatandaş faali, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
